1 Kɔrɩntɩ Nɩaa 9 - WƖA TENIŊ

Wɩalɩŋ Yesu nanzɔɔba sɩ jaŋ wuo ŋaa

¹ Ma sɩ namɛ ŋɩɩ, mɩ bɩ mɩ tɩtɩa tɩɩ? Mɩ bɩ Wɩa nanzɔɔ ŋaa? Mɩ ha bɩ Yesu La Tɩɩna naa? Ma sɩ laa wɩalɩŋ dii bɩ daga arɩ mɩ tɩma pɩ La Tɩɩna nɛɛ?

² Dɩ nɩaa dɔnsʋŋ nɛ paala bɩ laa dii arɩ mɩ ŋaa Wɩa nanzɔɔ, ma-na teeŋ mɩ ŋaa nɛ. Mɩɩsɩ-la ma sɩ kɛnɛ La Tɩɩna Kirisito lɛ daga arɩ mɩ ŋaa ʋ nanzɔɔ nɛ a tɩma pʋpʋ.

³ Dɩ nɩaa nɩɩ bʋl mɩ teeŋ, ŋ-la nɛ mɩ yie bʋl a laa mɩ tɩtɩa:

⁴ Ʋ bɩ wombiiŋ kɛnɛ la sɩɩ bʋl Wɩa wɩaa a pɩpɩma, dɩ ma ma pɩla kʋdiilee arɩ lɩɩŋ, koo?

⁵ Ʋ bɩ wombiiŋ kɛnɛ dɩ la ma jaa haalaa sɩ laa Yesu wɩaa dii, dɩ ba to la harɩŋ a mʋmʋ lere-la la sɩɩ bʋl Wɩa wɩaa, koo? Wɩa nanzɔɔba dɔnsʋŋ arɩ La Tɩɩna Yesu ŋaanaa arɩ Pɩɩta ba sɩɩ yɩrɛ Kɩɩfas yie ŋaa ŋɩɩ nɛ.

⁶ Ma bɩɩna mɩ dɩ Banabas dʋndʋŋa nɛ maga dɩ la bʋl Wɩa wɩaa aŋ pɛ tɩma pɛ la tɩtɩa lɛɛ?

⁷ Laalɩyuori bɛɛ nɛ yie chɛ ʋ tɩtɩa tɩntɩnnɩ kɩaa a kaa tɩtɩŋ? Paarɩ bɛɛ nɛ bɩ ʋ tɩtɩa baga kɩaa ka dii? Nɛ-daarɩ bɛɛ nɛ bɩ ʋ tɩtɩa nayɩlɩŋ ka nyʋa?

⁸ Ma bɩɩna mɩ kɛŋ wɩalɩŋ dʋnɩa nɩaa sɩɩ ŋaa tapʋlɩɩ-na kala nɛ a kaa mɩmagɩsɛɛ? Wɩalɩŋ Mosis sɩ ŋmʋnsa bil dɩ nɩaa tuto, ba bɩ ŋɩɩ tɩtɩa bʋla ba lɛɛ?

⁹ Wɩalɩŋ Mosis sɩ ŋmʋnsa bil tʋɔŋ, ba bʋla, “Dɩ nɛŋ nɩɩ ŋmoo mɩaa, ʋ bɩ maga dɩ ŋ vɔɔ ʋ niiŋ tɔ.” Ʋ bɩ naga nɛŋ-la wɩaa nɛ Wɩa chɩl.

¹⁰ Wɩa sɩ bʋl wɩɩŋ deeŋ, la wɩaa nɛ ʋ bʋbʋl ŋɩɩ. La nɩalɩŋ sɩɩ bʋl Wɩa wɩaa nɛ ba ŋmʋnsɛ wɩɩŋ deeŋ pa. Paaraa arɩ nɩalɩŋ sɩɩ kʋŋ baga kɩaa kala yie yɩyɩɛlɛ arɩ ba kɛŋ toruŋ nɛ kɩalɩŋ lɛ.

¹¹ Ŋɩɩ tɩtɩa nɛ Wɩa wɩalɩŋ la sɩ bʋla pɩma, ba nagɛ kʋdoho nɛ la duu ma teeŋ. Ŋɩɩ wɩaa dɩ ma nɩɩ pɛ la lɛ arɩ dʋnɩa kɩaa, ma sɩ́ bɩɩna arɩ ma ŋaa kikieli nɛ.

¹² Dɩ ma nɩɩ pɩ nɩaa dɔnsʋŋ kɩaa deemba, ʋ bɩ maga dɩ ma faasa pɩla a kɩɩbaa? Ama la-na bɩ ŋɩɩ joŋo ʋ ŋaa fʋgʋna, dɩ la sɩ́ wɩɩkala ŋaa kɛrɛ Wɩa wʋzɔmɔ-la sɩ tɩgɛ Kirisito wombiiŋ lɛ.

¹³ Nʋʋkala dii ʋ tɩntɩŋŋaa leriŋ nɛ. Ma jɩma nɩɩ-la sɩɩ tɩŋ Wɩa dɩa lɛ ka dii Wɩa dɩa lɛ nɛ, nɩalɩŋ ma sɩ ŋaa Wɩɩsʋllɩ sɩpaalaara Wɩɩsʋllɩ koruŋ lɛ, ba ma yie laa ba toruŋ nɛ Wɩɩsʋlʋŋ kɩalɩŋ lɛ.

¹⁴ Ŋɩɩ tɩtɩa nɛ La Tɩɩna bʋl dɩ nɩalɩŋ sɩɩ bʋl Wɩa wʋzɔmɔ-la, dɩ ba ma to nɩmɛ a ma nɩna ba kʋdiilee.

¹⁵ Ama mɩ ha bɩ wombiiŋ deeŋ to a chɩchɛ mɩ kʋchɛɛlɛɛ. Mɩ saa bɩ teniŋ deeŋ ŋmʋnsa pɩma, dɩ mɩ laa kɩaa ma teeŋ. Mɩ bɩ jaŋ sɛɩ dɩ nʋʋkala joŋ kʋŋ pɩmɛ, dɩ mɩ sɩ́ wuo bigisi mɩ tɩtɩa lɛ wombii-la mɩ sɩɩ to lɛ. Mɩ sɩ jaŋ sʋʋ nɛ kpɩa nʋʋkala sɩ jaŋ ŋaa ŋɩɩ mɩ lɛ.

¹⁶ Mɩ bɩ wombii kɛnɛ dɩ mɩ bigisi mɩ tɩtɩa lɛ a tɩŋ mɩ sɩɩ bʋl Wɩa wʋzɔmɔ-la wɩaa. Ba tɩmmɛ nɛ dɩ mɩ bʋlba. Ʋ jaŋ lɔrɔ pɩmɛ dɩ mɩ nɛ bɩ Wɩa wʋzɔmɔ-la ka bʋl.

¹⁷ Dɩ mɩ nɛ faa bʋl Wɩa wʋzɔmɔ-la mɩ tɩtɩa tʋɔtɔrʋŋ lɛ, ŋɩɩ nɛ mɩ fa jaŋ chɩchɛ dɩ mɩ laa time. Ama mɩ tɩtɩa tʋɔtɔrʋŋ lɛ dee mɩ tɩtɩŋ, Wɩa nɛ sɩ mɩ tɩŋ.

¹⁸ Ŋɩɩ wɩaa saa, bɛɛ kʋŋ time nɛ ba jaŋ joŋo timmi? Mɩ bɩ kʋŋkala ka chɛ. Mɩ tɩntɩmɩŋ nɛ dɩ mɩ bʋl Wɩa wʋzɔmɔ-la a pɩma, a sɩ́ kʋŋkala laa nʋʋkala teeŋ. Mɩ bɩ jaŋ laa kʋ-la sɩ maga dɩ mɩ na a tɩŋ mɩ sɩɩ bʋl Wɩa wʋzɔmɔ-la wɩaa.

¹⁹ Mɩ nɛ tɩɩ mɩ tɩtɩa, mɩ tuo nʋʋkala yoŋ. Ama mɩ kɛŋ mɩ tɩtɩa bɩrɩmɛ nʋʋkala yoŋ nɛ dɩ mɩ na nɩaa yʋgɛ dɩ ba kʋ to Wɩa.

²⁰ Dɩ mɩ nɛ mʋ Juu tɩŋŋaa teeŋ, mɩ yie kɛŋ mɩ tɩtɩa a nagɛ arɩ mɩ ŋaa Juu tɩɩna nɛ, dɩ mɩ wuo bʋl Wɩa wɩaa pɩba, dɩ ba kʋ to Wɩa. Dɩ mɩ nɛ mʋ nɩalɩŋ sɩɩ to wɩalɩŋ Mosis sɩ ŋmʋnsa bil dɩ nɩaa tuto teeŋ, mɩ yie kɛŋ mɩ tɩtɩa a nagɛ ba tʋɔŋ dɔŋɔ nɛ, ama mɩ bɩ ba wombii-la-na ka to. Mɩ yie ŋaa ŋɩɩ dɩ mɩ wuo na dɩ ba dɔnsʋŋ kʋ tuto Wɩa nɛ.

²¹ Ŋɩɩ tɩtɩa nɛ, dɩ mɩ dɩ nɩalɩŋ sɩ bɩ Juu tɩŋŋaa ŋaa nɛ hɔnɔ, mɩ yie kɛŋ mɩ tɩtɩa bɩrɩmɛ ba dɔŋɔ nɛ, dɩ mɩ wuo na dɩ dɔnsʋŋ kʋ to Wɩa. Wɩɩŋ deeŋ bɩ naga arɩ mɩ bɩ wɩalɩŋ Wɩa sɩ bile dɩ la tuto ka to. Ama mɩ sɛnɛ tuto wɩalɩŋ Kirisito sɩ bʋla nɛ.

²² Dɩ mɩ nɛ mʋ nɩalɩŋ sɩ bɩ waa Wɩa wɩaa lɛ teeŋ, mɩ yie kɛŋ mɩ tɩtɩa a nagɛ ba dɔŋɔ nɛ, dɩ mɩ wuo leŋ dɩ ba kʋ to Wɩa. Mɩ yie kɛŋ mɩ tɩtɩa bɩrɩmɛ a nagɛ nʋʋkala nɛ dɩ mɩ wuo laa dɔnsʋŋ ta, dɩ mɩ nɛ wuolo.

²³ Wɩaa deemba kala mɩ sɩɩ ŋaa, mɩɩ ŋaaba a tɩŋ Wɩa wʋzɔmɔ-la wɩaa nɛ. Mɩ ŋaa ŋɩɩ dɩ mɩ ma wuo na kʋzɔmɔ-la nɩalɩŋ sɩ laa Wɩa wʋzɔmɔ-la dii sɩ jaŋ na Wɩa teeŋ nɛ.

²⁴ Ma kala jɩma arɩ nɩaa nɩɩ fá, fɩfaara-la kala yie fá nɛ. Ama ba tʋɔŋ nɩbala nɛ yie dii. Ŋɩɩ wɩaa, má faasa fá a wuo dii a laa kɩaa.

²⁵ Fɩfaarɩ-na kala ba sɩɩ dagʋ yie jɩma kɛŋ ʋ tɩtɩa wɩɩ-na kala lɛ nɛ dɩ ʋ wuo fá a dii. Ama ʋ sɩ yie fá a dii kʋ-la, ʋ bɩ dieni aŋ ka ʋ chei. Ama la-na yie fá a dii kʋ-la sɩ bɩ chei nɛ. Ʋ jaŋ hɛ nɩmɛ deeŋ deeŋ.

²⁶ Ŋɩɩ nɛ tɩɩ mɩɩ fá tegi tegi a mʋmʋ dɩdɛrɩŋ ŋɩɩ. Ŋɩɩ nɛ tɩɩ mɩ bɩra nagɛ chɔrɩa ŋmuŋmooro ŋɩɩ. Mɩ bɩ mɩ nɩsɩŋ viise tɩta pɛɩ.

²⁷ Mɩ kɛŋ mɩ tɩtɩa kala a ŋaa mɩ yaraa diri nɛ arɩ ŋmobuŋ lɛ. Mɩ ŋaa ŋɩɩ dɩ mɩ wuo kɛŋ mɩ tɩtɩa hɛ dɔŋɔ lɛ nɛ. Dɩ ŋɩɩ dee, dɩ mɩ nɛ bʋl Wɩa wʋzɔmɔ-la a dɛrɛ, ba jaŋ bʋla pɩmɛ arɩ mɩ bɩ toru kɛnɛ Wɩa kuorii-la tʋɔŋ.