1 Kɔrɩntɩ Nɩaa 11 - WƖA TENIŊ

Ŋɩɩ sɩ maga dɩ baalaa arɩ haalaa chʋɔlɛ Wɩa

¹ Má chesimi arɩ mɩ sɩɩ chesi Kirisito ŋɩɩ.

² Ma ŋaa kukeri nɛ ma sɩ liisi mɩ wɩaa wɩɩkala lɛ a tuto wɩalɩŋ mɩ sɩ dagɛma.

³ Ama mɩɩ chɛ dɩ ma jɩŋ arɩ Kirisito nɛ ŋaa baal-na kala sɩpaalaara, ka baala ma nɛ ŋaa haala sɩpaalaara, ka Wɩa ma nɛ laa Kirisito sɩpaaŋ.

⁴ Ŋɩɩ wɩaa dɩ baal nɩɩ chʋɔlɛ Wɩa, koo dɩ ʋ nɩɩ bʋl Wɩa wɩaa nɩaa tʋɔŋ, dɩ ʋ nɛ joŋ kʋŋ tɔ ʋ nyuŋ, ʋʋ hɩɩsɛ Kirisito nɛ.

⁵ Dɩ haal ma kala nɩɩ chʋɔlɛ Wɩa koo dɩ ʋ nɩɩ bʋl Wɩa wɩaa, aŋ bɩ kʋŋ joŋo tɔ ʋ nyuŋ, ʋʋ hɩɩsɛ ʋ bala nɛ. Dɩ haal nɛ bɩ kʋŋ joŋo tɔ ʋ nyuŋ, ʋ naga arɩ ʋ fʋŋ ʋ nyuŋ nɛ.

⁶ Dɩ haal nɛ bɩ chɛ dɩ ʋ joŋ kʋa tɔ ʋ nyuŋ, ʋ maga dɩ ʋ fʋŋ ʋ nyuŋ nɛ. Ʋ sɩ ŋaa hɩɩsɛ wɩɩ ŋɩɩ dɩ haala nɛ fʋŋ ʋ nyuŋ koo dɩ ʋ kɛ ʋ nyuŋ ŋɩɩ, ʋ maga dɩ haala joŋ kʋŋ nɛ a tɔ ʋ nyuŋ.

⁷ Baala-na bɩ maga dɩ ʋ joŋ kʋŋ a chu tɔ ʋ nyuŋ, bɛɛ wɩaa ŋɩɩ Wɩa sɩ naga, ŋɩɩ tɩtɩa nɛ ʋ ŋaa baala. Baala tʋla lɩɩ Wɩa teeŋ nɛ, ka haala ma tʋla lɩɩ baala teeŋ,

⁸ bɛɛ wɩaa haala lɛ dee Wɩa to a ŋaa baala, ama ʋ to baala lɛ nɛ a ŋaa haala.

⁹ Bɩra, Wɩa bɩ baala ŋaa a tɩŋ haala wɩaa, ama ʋ ŋaa haala nɛ a tɩŋ baala wɩaa.

¹⁰ A tɩŋ Wɩa tɩndaaraa wɩaa haala maga dɩ ʋ joŋ kʋŋ nɛ a vɔɔ tɔ ʋ nyuŋ a dagɛ arɩ ʋʋ to ʋ bala niiŋ nɛ.

¹¹ Nɩalɩŋ sɩ laa Kirisito wɩaa dii lɛ, baala bɩ ʋ tɩtɩa tɩɩ, haala ma bɩ ʋ tɩtɩa tɩɩ, ba kala tɩɩ dɔŋɔ nɛ.

¹² Wɩa sɩ to baala lɛ a ŋaa haala ŋɩɩ, ŋɩɩ tɩtɩa nɛ haala ma lʋlʋl baala. Wɩa nɛ ŋaa ba kala.

¹³ Má tɩtɩa bɩɩnɛ wɩɩŋ deeŋ woruŋ, a na dɩ haal nɩɩ chʋɔlɛ Wɩa lee-la nɩalɩŋ sɩ laa Yesu wɩaa dii sɩɩ hilimu aŋ bɩ kʋŋ joŋo tɔ ʋ nyuŋ, ʋ zɔmɔ nɛɛ?

¹⁴ Wɩa sɩ ŋaa baala, ʋ daga arɩ baala arɩ nyu-pʋŋ-duduosuŋ kɛŋ hɩɩsɩŋ nɛ,

¹⁵ ama haala-na tʋɔŋ jaŋ wuo tɔrɛ a tɩŋ ʋ nyu-pʋŋ-duduosu-la wɩaa. Wɩa joŋ nyu-puŋ-duduosuŋ pɩ haala dɩ ʋ kaa tɔ ʋ nyuŋ nɛ.

¹⁶ Dɩ nʋʋ nɛ saa chɛ dɩ ʋ kɛŋ wɩɩŋ deeŋ kaalɛrɛ, mɩ jaŋ bʋl arɩ wɩɩ-la nɛ la tuto. Wɩɩ dɔŋ kala tuo. Nɩalɩŋ sɩ laa Yesu wɩaa dii aa hilimi ma ka to ŋɩɩ nɛ.

Ŋɩɩ sɩ maga dɩ la dii kɩalɩŋ a liliisi Yesu wɩaa

¹⁷ Wɩaa deemba mɩ sɩɩ chɛ dɩ mɩ dagɛma lɛ, mɩ bɩ jaŋ bɛsɛ ma lɛ, bɛɛ wɩaa dɩ ma nɛ hilime dɩ ma chʋɔlɛ Wɩa, ma yie bɩ dɔŋɔ lɛ pɛ. Ma yie chichei dɔŋɔ nɛ.

¹⁸ Wɩɩ-la mɩ sɩɩ chɛ dɩ mɩ bʋl nɛ ŋ-la: Mɩ nɩa dɩ ma nɛ kʋ hilimi dɩ ma chʋɔlɛ Wɩa, ma bɩ nii-bala ka kɛŋ. Mɩ saa laa dii a nagɛ wʋtɩtɩɩ mʋa hɛ wɩɩŋ deeŋ mɩ sɩ nɩa lɛ.

¹⁹ Ʋ paala magɛ dɩ nii-lɩɛbaa hɛ ma pɛgɛ nɛ, dɩ ma to ŋɩɩ lɛ a jɩŋ nɩalɩŋ sɩ ŋaa nɩtɩtɩɩba.

²⁰ Dɩ ma nɛ kʋ hilimi, dɩ ma dii kʋdiile-la La Tɩɩna Kirisito sɩ sɩ dɩ la didii a liliisi ʋ wɩaa, ma sɩ yie ŋaa ŋɩɩ bɩ daga arɩ kʋdiile-la nɛ ma didii ŋɩɩ,

²¹ bɛɛ wɩaa, nʋʋkala yie didii ʋ kɩaa, ʋ bɩ ʋ dɔŋɔ ka gbɛrɛ. Dɔnsʋŋ yie kɛŋ losuŋ, ka dɔnsʋŋ ma bugi.

²² Bɛɛ ba! Ma bɩ dɩɩsɩŋ kɛnɛ ma sɩ jaŋ wuo hɔŋ nɩmɛ a dii kʋdiilee aŋ pɛ nyʋnyʋa kɩaa? Koo maa chɛ dɩ ma mɔŋ nɩalɩŋ sɩ laa Yesu wɩaa dii aa hilimi, aŋ leŋ dɩ nɩalɩŋ sɩ bɩ kʋŋ kɛnɛ ba tʋɔŋ dii hɩɩsɩŋ nɛɛ? Bɛɛ nɛ maa chɛ dɩ mɩ bʋla pɩma a tɩgɛ wɩɩŋ deeŋ lɛ? Mɩ bɛsɛ ma lɛɛ? Aɩ, mɩ bɩ jaŋ bɛsɛ ma lɛ.

²³ La Tɩɩna Kirisito teeŋ nɛ mɩ laa wɩalɩŋ mɩ sɩ dagɛma. Tɩtaŋ-la ba sɩ joŋ La Tɩɩna Yesu yallɛ nɛ, ʋ joŋ boroboro

²⁴ a lɔllɛ Wɩa, aŋ kaa chɔgɛ aŋ bʋl, “Mɩ yaraa nɛ ŋ-la mɩ joŋo pɩma, má laa dii. Má ŋaa ŋɩɩ a liliisi mɩ wɩaa.”

²⁵ Ŋɩɩ nɛ ba sɩ dii boroboro-la dɛrɛ, ʋ bɩra joŋ nyʋnyʋala arɩ sɩnɩŋ aŋ bʋl, “Nyʋnyʋala deeŋ nɛ Wɩa joŋo hɩhɛ nii-falɩɩ-la ʋ dɩ ma pɛgɛ. Mɩ jaŋ sʋʋ dɩ mɩ chalɩŋ jaasɛ. Bʋa na-kala lɛ dɩ ma nɩɩ nyʋaʋ, má nyʋa a liliisi mɩ wɩaa.”

²⁶ Ka dɩ La Tɩɩna-na kɔ, má dii boroboro deeŋ aŋ nyʋnyʋa nyʋnyʋala deeŋ tʋɔŋ. Dɩ ma nɩɩ ŋaa ŋɩɩ, ma dagʋ arɩ La Tɩɩna Kirisito sʋʋ ma wɩaa nɛ.

²⁷ Ŋɩɩ wɩaa dɩ nʋʋkala nɛ dii boroboro-la koo a nyʋa nyʋnyʋala-la tʋɔŋ ŋɩɩ sɩ bɩ maga, ʋ ŋaa wʋbɔŋ nɛ, bɛɛ wɩaa ʋ bɩ La Tɩɩna yaraa arɩ ʋ chal-la joŋo arɩ ba ŋaa sɩɩfɩaŋ kɩaa.

²⁸ Nʋʋkala maga dɩ ʋ laa sɩpaaŋ a beŋ ʋ tɩtɩa lɛ woruŋ aŋ-na dii boroboro-la, a nyʋa nyʋnyʋala-la tʋɔŋ ma.

²⁹ Dɩ nʋʋ nɛ bɩ ʋ tɩtɩa lɛ bene woruŋ arɩ boroboro-la ʋ sɩɩ dii ŋaa Kirisito yaraa nɛ, sɩ-huo-la ma ŋaa ʋ chalɩŋ, ʋ kɛŋ ʋ tɩtɩa baŋŋaa hɛ ŋmɛnɩŋ nɛ ŋɩɩ.

³⁰ Ma dɔnsʋŋ hɛ nɩmɛ a bɩ ma tɩtɩa lɛ bene aŋ-na didii boroboro-la, aŋ pɛ nyʋa nyʋnyʋala-la tʋɔŋ. Ŋɩɩ nɛ tɩɩ ma dɔnsʋŋ wʋwɩɩlɛ ŋɩɩ, ka dɔnsʋŋ ma pʋgʋmɛ, ka dɔnsʋŋ ma sʋʋ.

³¹ Dɩ la nɛ laa sɩpaaŋ beŋ la tɩtɩa lɛ, la bɩ jaŋ kɛŋ la tɩtɩa baŋŋaa kaa hɛ ŋmɛnɩŋ lɛ Wɩa teeŋ.

³² Ama dɩ Wɩa nɛ na dɩ la cheye, ʋ yie dɔgɩsɛla nɛ a kɛnla tʋrɛ. Ʋ yie ŋaa ŋɩɩ dɩ ʋ sɩ́ la joŋo pɛ dʋnɩa nɩaa lɛ a cheila.

³³ Ŋɩɩ wɩaa mɩ naambiiriŋ, dɩ ma nɛ hilime dɩ ma dii kʋdiile-la La Tɩɩna sɩ sɩ la didii a liliisi ʋ wɩaa, má gbɛrɛ dɔŋɔ.

³⁴ Dɩ losuŋ nɛ kɛŋ ma dɔŋɔ, ʋ maga dɩ ʋ dii kɩaa ʋ dɩa lɛ nɛ aŋ-na kɔ. Dɩ ma nɛ ŋaa ŋɩɩ aŋ hilimi, Wɩa bɩ jaŋ joŋ cheeriŋ pɩma. Wʋkaanala-na, dɩ mɩ nɛ kɔ, mɩ jaŋ dagɛma ba wombiiŋ.