1 Kɔrɩntɩ Nɩaa 1 - WƖA TENIŊ

¹ Mɩ-na Pɔɔl, arɩ la naambie Sɔsɩtɛnɩs nɛ ŋmʋnsɛ teniŋ deeŋ pɩpɩma. Wɩa tʋɔtɔrʋŋ lɛ nɛ ʋ lɩɩsɛmɛ dɩ mɩ ŋaa Yesu Kirisito nanzɔɔ.

² La ŋmʋnsɛ teniŋ deeŋ a pɩpɩ nɩalɩŋ sɩ laa Yesu wɩaa dii aa hilimi Kɔrɩntɩ taŋ-la lɛ nɛ, nɩalɩŋ Wɩa sɩ to Kirisito lɛ a pɩɩsɛ ba disiniŋ ta, dɩ ba ŋaa tʋɔpʋl tɩmma ʋ sɩpaaŋ, a saa pɛ nɩalɩŋ kala sɩɩ chʋɔlɛ Yesu Kirisito a hɛ dʋnɩa sɛmɛ-na kala. Yesu Kirisito ŋaa la dɩ ma kala Tɩɩna nɛ.

³ La Nyɩmma Wɩa arɩ La Tɩɩna Yesu Kirisito lahɔrɩmɔ lɛ, ma jaŋ hɔŋ arɩ fɩɛlɩŋ.

Wɩa to Kirisito lɛ nɛ a pɛ la lɛ

⁴ Mɩ yie lɔllɛ Wɩa woruŋ a tɩŋ ma wɩaa, bɛɛ wɩaa ʋ to Kirisito Yesu lɛ nɛ a leŋ ma jʋʋ ʋ lahɔrɩmɔ.

⁵ Wɩɩ-na kala lɛ, Wɩa to Yesu lɛ nɛ a pɛ ma lɛ woruŋ, ma kɛŋ wʋjɩmɩŋ, a jɩŋ wɩaa bʋlʋŋ ma.

⁶ Wɩɩ-la chaasa chɩŋ nɛ, bɛɛ wɩaa wʋzɔmɔ-la la sɩ bʋla a tɩgɛ Kirisito lɛ hɛ ma tʋɔŋ nɛ woruŋ.

⁷ Ŋɩɩ wɩaa, ma sɩɩ gbɛrɛ La Tɩɩna Yesu Kirisito dɩ ʋ mɩɩra kɔ ŋɩɩ, ŋɩɩ nɛ tɩɩ ʋ joŋ kɩalɩŋ kala sɩ lɩɩ ʋ Dɩŋ-zɔmʋŋ teeŋ a dii zile ma lɛ.

⁸ Wɩa ma jaŋ chaasa kɛmma woruŋ dɩ ma sɩ́ wʋbɔŋ ŋaa, a kaa mʋ yi tapʋlɩɩ-la La Tɩɩna Yesu Kirisito sɩ jaŋ mɩɩra kɔ.

⁹ Wɩa kɛŋ wʋtɩtɩɩ. Ʋ nɛ yɩrɛma dɩ ma dɩ ʋ Bie Yesu Kirisito kʋ ŋaa kʋbala. Ʋ nɛ ŋaa La Tɩɩna.

Nɩalɩŋ sɩ laa Yesu wɩaa dii sɩɩ yuo dɔŋɔ

¹⁰ Mɩ naambiiriŋ, mɩɩ sʋl ma kala La Tɩɩna Yesu Kirisito yɩrɩŋ lɛ, dɩ ma kala kɛŋ nii-bala a sɩ́ dɔŋɔ lɛ pɔrʋ. Mɩɩ sʋlma dɩ ma kɛŋ tʋɔ-bala a chɩŋ wʋbala lɛ.

¹¹ Mɩ naambiiriŋ, mɩ nɩa dɩ maa yuo dɔŋɔ nɛ. La naambie ba sɩɩ yɩrɛ Kuluuwi, ʋ dɩa nɩaa nɛ bʋla pɩmɛ.

¹² Wɩɩ-la mɩ sɩ nɩa nɛ ŋ-la: Ma dɔŋɔ yie bʋl dɩ ʋʋ to Pɔɔl harɩŋ nɛ, ka dɔŋɔ ma sɩ dɩ ʋʋ to Apɔlɔs harɩŋ nɛ. Dɔŋɔ ma sɩ ʋʋ to Pɩɩta harɩŋ nɛ, ka dɔŋɔ ma sɩ ʋʋ to Kirisito harɩŋ nɛ.

¹³ Má leŋ dɩ mɩ pɩɛsɛma wɩɩŋ deeŋ: Kirisito ŋaa bʋlɩa nɛɛ? Ba kpaasɛ Pɔɔl mɛrɛ daagɛsɛ nyuŋ dɩ ʋ laama ta nɛɛ? Ba foma Wɩɩchʋɔlɛ lɩɩŋ Pɔɔl yɩrɩŋ lɛ nɛɛ?

¹⁴ Mɩɩ lɔllɛ Wɩa arɩ mɩ sɩ bɩ ma kʋŋkala Wɩɩchʋɔlɛ lɩɩŋ fo, see la naambie Kirisipas arɩ Gayas dʋndʋŋa.

¹⁵ Ŋɩɩ wɩaa nʋʋ ma saa bɩ jaŋ wuo bʋl arɩ mɩ fou Wɩɩchʋɔlɛ lɩɩŋ dɩ ʋ ŋaa mɩ harɩ-tooru.

¹⁶ Mɩ liise yi arɩ mɩ fo la naambie Sɩtɛfanas arɩ ʋ dɩa nɩaa ma Wɩɩchʋɔlɛ lɩɩŋ. Ama mɩ bɩra bɩ jaŋ wuo liise yi dɩ mɩ fo nʋʋ dɔŋ ma Wɩɩchʋɔlɛ lɩɩŋ.

¹⁷ Kirisito bɩ mɩ tɩma dɩ mɩ kʋ fo nɩaa Wɩɩchʋɔlɛ lɩɩŋ. Ʋ tɩmmɛ dɩ mɩ kʋ bʋl Wɩa wʋzɔmɔ-la nɛ. Nuhuobiine wʋjɩmɩŋ dee ʋ joŋo pɩmɛ mɩ kaa bʋbʋl wɩalɩŋ. Ʋ ŋaa ŋɩɩ dɩ dol-la sɩ lɩɩ Kirisito lɛ, a tɩŋ ʋ sɩ sʋʋ daagɛsɛ nyuŋ, sɩ́ pɛɩ ŋaa nɛ.

Kirisito nɛ ŋaa Wɩa doluŋ arɩ ʋ wʋjɩmɩŋ

¹⁸ La bʋla arɩ Kirisito sʋʋ daagɛsɛ nyuŋ, ŋɩɩ bɩ bʋbʋɔ kɛnɛ nɩalɩŋ sɩ lɛlɛ teeŋ. Ama la nɩalɩŋ Wɩa sɩ laa ta, wɩalɩŋ nɛ ŋaa Wɩa doluŋ la teeŋ.

¹⁹ Wɩa teniŋ tʋɔŋ ba bʋla dɩ Wɩa sɩ ʋ jaŋ leŋ dɩ wʋjɩnnaa wʋjɩmɩɩ-la ŋaa pɛɩ, dɩ wʋjɩŋ kɩŋkɛŋ tɩŋŋaa wʋjɩmɩŋ ma ŋaa pɛɩ.

²⁰ Dɩ ŋɩɩ nɛ ŋaa, nɩɩ nɛ wʋjɩnna-la jaŋ hɛ? Wʋjɩŋ kɩŋkɛŋ tɩmma-la, nɩɩ nɛ ba jaŋ hɛ? Teŋ-jɩnnɩ babiibala-la ba ma jaŋ hɛ nɩɩ? Wɩa daga arɩ dʋnɩa deeŋ wʋjɩmɩŋ ŋaa nɩyaarɩ wʋjɩmɩɩ nɛ.

²¹ Wɩa sɩ kɛŋ wʋjɩmɩŋ, ŋɩɩ nɛ tɩɩ ʋ wuo ŋaa dɩ nuhuobiine sɩ́ ʋ tɩtɩa wʋjɩmɩŋ lɛ to a jɩŋ ʋ-na Wɩa. Nɩaa sɩ dɩ Wɩa wʋzɔmɔ-la la sɩɩ bʋl ŋaa wʋtɔɔnʋ nɛ, ama Wɩa to wɩalɩŋ lɛ nɛ a laa nɩalɩŋ sɩ laa wɩalɩŋ dii a ta.

²² Juu tɩŋŋaa cho dɩ Wɩa ŋaa wʋmagɩl nɛ dɩ ba na, ka Giriik tɩŋŋaa ma cho dɩ Wɩa dagɛ ʋ wʋjɩmɩŋ dɩ ba na.

²³ Ama Kirisito sɩ sʋʋ daagɛsɛ nyuŋ wɩaa nɛ la bʋbʋl. Kirisito sɩ sʋʋ daagɛsɛ nyuŋ leŋe Juu tɩŋŋaa baanɩŋ sisii, aŋ ka nɩalɩŋ sɩ bɩ Juu tɩŋŋaa ŋaa ma teeŋ ʋ ŋaa wʋpɛɩ nɛ.

²⁴ Ama nɩalɩŋ Wɩa sɩ yɩra kala teeŋ, Juu tɩŋŋaa arɩ Giriik tɩŋŋaa kala, Kirisito lɛ nɛ Wɩa doluŋ arɩ ʋ wʋjɩmɩŋ kala hɛ.

²⁵ Ʋ maga dɩ ma jɩŋ arɩ wɩɩ-la sɩ lɩɩ Wɩa teeŋ, ka nɩaa bʋl arɩ ʋ ŋaa nɩyaarɩ wɩɩ nɛ, ʋ nɛ paala kpɩa nuhuobiine wʋjɩmɩŋ. Wɩɩ-la ma sɩ lɩɩ Wɩa teeŋ, ka nuhuobiine sɩ ʋ ŋaa wʋpʋgʋ nɛ, ʋ kɛŋ doluŋ a kɩɩ nuhuobiine.

²⁶ Mɩ naambiiriŋ, má liise yi ŋɩɩ ma fa sɩ naga bʋa-la lɛ Wɩa sɩ yɩrɛma. Ma tʋɔŋ nɩaa baŋmɛɛ nɛ fa kɛŋ wʋjɩmɩŋ, koo ma tʋɔŋ nɩaa baŋmɛɛ nɛ fa kɛŋ doluŋ? Ma nɩaa baŋmɛɛ ma nɛ fa ŋaa nɩbalaa nuhuobiinee teeŋ?

²⁷ Wɩa paala chaasa lɩɩsɛ nɩalɩŋ dʋnɩa nɩaa sɩ sɩ ba ŋaa nɩyaara nɛ, dɩ ʋ wuo hɛ dʋnɩa nɩaa wʋjɩnnaa hɩɩsɩŋ lɛ. Wɩa bɩra lɩɩsɛ nɩalɩŋ ma dʋnɩa nɩaa sɩ sɩ ba ŋaa nɩpʋgʋnʋŋ nɛ, dɩ ʋ wuo hɛ nɩduoruŋ hɩɩsɩŋ lɛ.

²⁸ Wɩa lɩɩsɛ nɩalɩŋ dʋnɩa nɩaa sɩ bee gʋgʋʋnɛ arɩ nɩalɩŋ sɩ bɩ lee kɛnɛ dʋnɩa lɛ, dɩ ʋ wuo chei nɩalɩŋ dʋnɩa nɩaa sɩ bɩɩna arɩ ba ŋaa nɩa.

²⁹ Wɩa ŋaa ŋɩɩ dɩ nʋʋkala sɩ́ ʋ doluŋ lɛ wuo to a bigisi ʋ tɩtɩa lɛ ʋ sɩpaaŋ.

³⁰ Ama Wɩa leŋe ma to Kirisito Yesu lɛ nɛ a kɛŋ mɩɩsɩŋ. Wɩa saa leŋe Kirisito nɛ ŋaa la wʋjɩmɩŋ. A tɩŋ ʋ wɩaa Wɩa laala ta nɛ, la kʋ ŋaa tʋɔpʋl tɩmma ʋ teeŋ, a ŋaa nɩalɩŋ sɩ bɩ disiniŋ kɛnɛ.

³¹ Wɩa teniŋ tʋɔŋ ba sɩ, “Dɩ nʋʋkala nɩɩ bigisi ʋ tɩtɩa lɛ, ʋ maga dɩ ʋ bigisi a mʋ tɩgɛ wɩɩ-la La Tɩɩna sɩ ŋaa lɛ nɛ.”