Sekaraea 8 - Pijin Bible

Yawe hemi promis fo blesim Jerusalem

¹ Narataem moa Yawe hu hemi garem evri paoa, hemi talemaot Mesij blong hem long mi.

² Hemi tok olsem, ?Mi garem barava strongfala tingting long Jerusalem. Dastawe nao mi lavem tumas olketa pipol blong hem, an mi kros fogud long olketa enemi blong hem.

³ ?Mi talem yufala tru nao: Bae mi gobaek moa long Jerusalem, an bae mi stap antap long maonten long Saeon. Bae olketa pipol i save tok olsem, ?Jerusalem hemi taon wea olketa pipol i tinghevi olowe nomoa long Yawe.? An maonten blong Yawe hu hemi garem evri paoa, bae olketa kolem hem ?Tambu Maonten.?

⁴ ?Olketa olo man an woman bae i save kam sidaon moa long olketa open ples blong datfala taon wea olketa pipol save hipap long hem. Nomata olketa olo tumas, mekem olketa mas yusim wokingstik, bae olketa fri fo wakabaot long taon.

⁵ An taon ya bae hemi fulap moa long olketa pikinini wea i stap evriwea long olketa rod an gohed fo plei.

⁶ ?Olketa pipol hu i laef yet an kambaek long taon, olketa ting olsem olketa samting ya hemi had tumas, hemi kanduit hapen. Bat mi Yawe nao mi garem evri paoa, an no enisamting hemi had fo mi. Hem nao mesij blong mi Yawe.

⁷ ?Mi talem yufala tru nao: Long olketa ples wea olketa enemi i fosim pipol blong mi fo go stap olobaot long hem, long ist an long west, bae mi sevem olketa ya.

⁸ Bae mi tekem kambaek olketa moa long Jerusalem. Bae olketa i pipol blong mi, an bae mi God blong olketa. An bae mi tinghevi long olketa olowe an rul ovarem olketa long stretfala wei.?

⁹ Yawe hemi gohed fo tok olsem, ?Olketa blong Israel. Yufala hu i herem moa toktok ya wea olketa profet bin talemaot long taem wea olketa pipol bin mekem faondesin blong Tambuhaos blong mi Yawe hu mi garem evri paoa, yufala mas strongim tingting blong yufala, mekem yufala save finisim waka long haos ya.

¹⁰ Bifoa datfala taem, olketa pipol i no garem seleni fo peim man o animol fo duim waka. No eniwan hemi save duim bisnis blong hem bikos olketa enemi i mekem laef hemi had fogud fo olketa. An mi mekem olketa fo agensim wantok blong olketa.

¹¹ ?Bat mi talem yufala tru nao: Distaem, bae mi no duim long yufala wea i stap laef yet olsem mi bin duim bifoa. Bae mi duim gud long yufala.

¹² Bae yufala save stap long piis, an olketa gaden blong yufala save grou gudfala. Olketa grep tri blong yufala bae i garem plande frut, an olketa kaikai wea yufala plantem bae i garem plande kaikai, bikos gudfala ren bae hemi kam. Oltaem bae mi blesim olketa hu i laef yet long olketa gudfala samting ya.

¹³ Olketa pipol blong Jiuda an Israel. Kam kasem tude, olketa pipol blong olketa narafala kantri i gohed fo yusim nem blong yufala fo mekem trabol hemi kam long man. Bat bae mi sevem yufala, an bae yufala kamap olsem wanfala gudfala blesing long evri narafala pipol. So yufala no fraet, an yufala mas strongim tingting blong yufala.

¹⁴ ?Taem olketa grani blong yufala i mekem mi kros, mi mekem plan fo letem trabol hemi kam kasem olketa, an mi mekem samting ya fo hapen.

¹⁵ Bat distaem mi mekem plan finis fo mekem gudfala samting fo hapen long Jerusalem an Jiuda. So yufala no fraet.

¹⁶ ?Olketa samting wea yufala mas duim hemi olsem: Yufala mas tok tru long olketa narafala pipol olowe. Taem yufala jajem pipol long kot, yufala mas jaj long stretfala wei.

¹⁷ Yufala mas no mekem nogud plan fo spoelem wantok. An taem yufala mekem strongfala promis fo tok tru, yufala mas no laea. ?Wei wea pipol i laea, an spoelem olketa wantok, an jajem man long wei wea hemi nating stret, olketa wei ya mi barava les long olketa nao.? Hem nao mesij blong Yawe.

¹⁸ Narataem moa Yawe hu hemi garem evri paoa, hemi talemaot Mesij blong hem long mi.

¹⁹ Hemi tok olsem, ?Olketa pipol blong Jiuda. Evri yia long mekfoa mans, an long mekfaev mans, an long mekseven mans, an long mekten mans, yufala bin mekem bikde wea yufala stop fo no kaikai. Bat distaem, olketa mans ya bae i kamap mans fo mekem fist, mekem yufala i hapi. Yufala mas laekem tumas tru toktok an stap gudfala tugeta long piis.

²⁰ ?Mi talem yufala tru nao: Taem bae hemi kamap wea pipol blong plande taon long olketa narafala kantri i kam long Jerusalem.

²¹ Long taem ya, bae olketa pipol blong wanfala taon i save tok olsem long olketa pipol blong narafala taon, ?Distaem mifala go fo prea an wosipim Yawe hu hemi garem evri paoa, mekem hemi blesim mifala. Hemi gud fo yufala kam wetem mifala, mekem yumi go tugeta.?

²² Long wei olsem, plande pipol blong olketa strongfala kantri bae i kam long Jerusalem fo wosipim mi. An bae olketa prea kam long mi, mekem mi blesim olketa.

²³ Long datfala taem, tenfala strensa wea langguis blong olketa hemi deferen, bae i holem kaleko blong wanfala Jiu, an tok olsem long hem, ?Plis yu letem mifala fo go wetem yufala long Jerusalem, bikos mifala herem dat God hemi stap wetem yufala.??