Sekaraea 7 - Pijin Bible

Stretfala wei fo wosipim Yawe

¹ Long mekfoa de long meknaen mans, wea hemi mans long Kislev, blong mekfoa yia wea King Darias hemi rul ovarem Pesia, Yawe hemi talemaot Mesij blong hem long mi.

^2-3 Long datfala taem, olketa pipol blong Betel i bin sendem Saresa an Regem-Melek wetem olketa man blong tufala fo go long Tambuhaos blong Yawe hu hemi garem evri paoa. Olketa askem kuestin long olketa prist an profet long Tambuhaos olsem, ?Oltaem yumi bin gohed fo kipim kastom fo stop fo no kaikai an fo sore an krae long mekfaev mans long evri yia. ?Waswe, hemi gud fo mifala gohed fo duim samting ya, o nomoa??

⁴ Den Yawe hemi talemaot Mesij blong hem long mi. Hemi tok olsem,

⁵ ?Sekaraea. Yu mas askem olketa prist an olketa pipol blong disfala lan olsem: Long las seventi yia, long mekfaev mans blong evri yia, an long mekseven mans tu, yufala bin gohed fo stop fo no kaikai an fo sore an krae. ?Waswe, yufala bin gohed fo duim olsem fo mekhae long mi? Nomoa.

⁶ An yufala duim semsamting taem yufala gohed fo kaikai an dring. Yufala duim olsem fo mekem yufala seleva nomoa fo hapi.

⁷ ??Waswe, olketa toktok ya hemi sem mesij wea Yawe hemi bin talemaot long olketa profet bifoa, o nomoa? Ya, hemi sem toktok wea olketa olo blong yufala bin herem taem Jerusalem hemi stap gudfala, an hemi fulap long olketa gudfala samting. Plande pipol i stap long taon ya, an long olketa narafala taon wea i stap raonem. An long taem ya, plande pipol tu i stap long drae eria long Jiuda long saot, an long olketa smolfala hil long west.?

⁸ Yawe hemi talemaot moa Mesij blong hem long mi. Hemi tok olsem,

⁹ ?Oltaem mi Yawe nao mi gohed fo tok olsem long olketa pipol blong mi, ?Yufala mas jajem pipol long stretfala wei, an yufala mas kaen an sore long olketa narafala pipol.

¹⁰ Yufala mas no tritim nogud olketa wido, an olketa pikinini wea dadi blong olketa i dae finis, an olketa strensa wea i stap wetem yufala, an olketa puaman. An yufala mas no mekem plan fo spoelem narafala pipol.?

¹¹ ?Bat olketa pipol blong mi i bikhed tumas, an olketa les fo lisin long toktok blong mi. Olketa evriwan i tanem baeksaet long mi,

¹² an mekem tingting blong olketa fo strong olsem ston. Hem nao mi kros tumas long olketa, bikos olketa nating laek fo obeim olketa lo an olketa toktok wea spirit blong mi hemi bin talemaot long olketa profet bifoa.

¹³ Taem mi bin kol aot long olketa, olketa les fo lisin. So taem olketa kol aot kam long mi, mi tu mi les fo lisin long olketa.

¹⁴ An bikos olketa duim olsem, mi kam olsem saekloun fo ronemaot olketa evriwan fo go stap olobaot long narafala kantri. An gudfala graon wea olketa bin stap long hem fastaem, hemi emti, mekem no eniwan nao hemi save stap long hem.?