Sekaraea 5 - Pijin Bible

Meksiks spesol drim: Skrol wea hemi flae kam

¹ Mi lukim narafala spesol drim moa, an long spesol drim ya mi lukim wanfala skrol wea hemi flae kam.

² An enjel wea hemi bin gohed fo tok wetem mi, hemi askem mi olsem, ??Wanem nao yu lukim?? An mi tok olsem long hem, ?Mi lukim wanfala skrol wea hemi flae kam. An longfala blong hem hemi kasem naen mita, an waed blong hem hemi kasem foa an haf mita.?

³ Nao hemi tok olsem long mi, ?Skrol ya hemi garem olketa toktok long hem fo mekem trabol hemi kam kasem evriwan long disfala lan. Long wanfala saet blong hem hemi talemaot dat evri man fo stil, bae Yawe hemi ronemaot olketa. An long nara saet hemi talemaot dat evri man hu hemi laea taem hemi mekem strongfala promis, bae Yawe hemi ronemaot olketa.

⁴ Hem ya mesij blong Yawe hu hemi garem evri paoa. Hemi tok olsem, ?Bae mi sendem toktok goaot long haos blong olketa man fo stil, an long haos blong olketa man hu hemi laea taem hemi mekem strongfala promis. An bae trabol ya hemi spoelem evri timba an ston long olketa haos ya, go-go olketa kamap nogud tumas.??

Mekseven spesol drim: Woman wea hemi sidaon insaet long wanfala basket

⁵ Mi lukim narafala spesol drim moa, an long spesol drim ya mi lukim dat enjel hu hemi bin gohed fo tok wetem mi hemi kam long mi moa, an hemi tok olsem, ?!Ei! !Yu lukim! !Wanfala samting moa hemi kamap!?

⁶ An mi askem hem olsem, ??Watkaen samting nao ya?? Nao hemi ansa olsem, ?Wanfala bikfala basket fo mesarem samting nao. Hem nao saen long sin blong olketa pipol long disfala lan.?

⁷ An mi lukim basket ya hemi garem kava wea olketa wakem long led. An taem mi lukluk yet, kava ya hemi open, an den mi sapraes fo lukim wanfala woman hemi sidaon insaet.

⁸ Enjel ya hemi tok olsem, ?Woman ya hemi saen blong olketa ravis wei blong sin.? An hemi pusum daon datfala woman insaet long basket, an hemi satem baek moa.

⁹ Den mi luk goap, mi lukim tufala narafala woman wea i flae kam. Wing blong tufala i strong fogud, olsem wing blong bikfala bed wea olketa kolem stok. Tufala flae kamdaon fo tekem basket ya an flae go wetem.

¹⁰ Nao mi askem enjel ya olsem, ??Long wea nao tufala tekem datfala basket??

¹¹ An hemi ansa olsem, ?Tufala i tekem go long kantri long Babilonia. Long ples ya bae olketa wakem wanfala tambuhaos fo hem, an taem haos ya hemi finis, bae olketa putum basket ya insaet long spesol ples blong hem.?