Sams 98 - Pijin Bible

God nao hemi rulim evrisamting long wol (Toktok go long olketa pipol.)

¹ Yumi mas singim wanfala niufala singsing fo preisim Yawe bikos hemi bin duim olketa bikfala samting. Hemi winim finis olketa enemi blong hem long faet. Ya, hemi win long paoa blong hem wea hemi holi an hemi strongfala tumas.

² Yawe hemi talemaot finis wea hemi bin winim olketa enemi ya long faet, an hemi somaot finis long olketa narafala kantri, wea hemi garem paoa fo sevem yumi.

³ Hemi kipim promis blong hem wea hemi bin mekem wetem yumi pipol long Israel, bikos oltaem hemi lavem yumi tumas. Nao evri pipol long evri ples i save finis wea God blong yumi hemi winim olketa enemi long faet.

^4-6 !Yawe nao hemi King blong yumi! !So yumi evriwan long wol mas hapi! !Yumi mas hapi an singaot, an preisim hem long olketa hapi singsing! !Yumi mas plei long gita, an bloum olketa trampet an bambu, taem yumi hapi an singsing fo preisim hem!

⁷ Yu solwata wetem evrisamting wea i stap long yu, yufala evriwan mas mekem bikfala noes. Yu wol wetem evri pipol wea i stap long yu, yufala evriwan mas singsing.

^8-9 Yufala olketa riva, yufala mas hapi an klapem han. !Ya, yufala olketa hil, yufala mas kam tugeta long frant blong Yawe fo singsing an preisim hem, bikos hemi kam fo rulim evri pipol long disfala wol! Ya, bae hemi jajem evri pipol long wol long stretfala wei.