Sams 97 - Pijin Bible

God nao hemi garem paoa ovam evrisamting (Toktok go long olketa pipol.)

¹ !Yawe nao hemi King! !Evri pipol long disfala wol, yufala mas hapi long hem! !Ya, yufala olketa pipol hu i stap long olketa aelan, yufala mas hapi long hem tu!

² Olketa blak klaod nao i stap raonem hem. Hemi rulim olketa pipol an hemi jajem olketa long wei wea hemi barava stret fogud.

³ God hemi sendem faea fo go fastaem long hem, fo bonem olketa enemi raonem hem.

⁴ Taem laetning blong hem hemi saen kam long evri ples, graon hemi barava seksek nao olsem man wea hemi fraet an hemi seksek.

⁵ Long ae blong Yawe hu hemi Masta blong evri pipol long wol, olketa maonten i save tane go nomoa long wata olsem kandol wea yu putum insaet long faea.

⁶ Evrisamting long skae i gohed fo talemaot dat God nao hemi stret fogud, an evri pipol long wol i lukim bikfala paoa blong hem.

⁷ Evriwan hu i wosipim olketa tambu kaving an tokpraod long olketa narafala god, bae olketa barava sem fogud, bikos olketa narafala god ya i baodaon nomoa fo wosipim Yawe.

(Toktok go long God.)

⁸ Lod Yawe, olketa pipol long Saeon an olketa pipol long olketa taon long Jiuda i hapi tumas, bikos yu bin stretem olketa trabol blong olketa.

⁹ Lod Yawe, yu nao yu king ovarem evri pipol long wol, an yu hae tumas winim evri narafala god.

(Toktok go long olketa pipol.)

¹⁰ Yawe hemi lavem tumas olketa hu i heitem olketa ravis wei, an hemi gadem laef blong olketa hu i tinghevi long hem. Ya, hemi sevem olketa from paoa blong olketa nogud pipol.

¹¹ Yawe hemi blesim olketa stretfala pipol, an hemi mekem olketa gudfala pipol fo hapi.

¹² Yufala evriwan wea wei blong yufala hemi stret, yufala mas hapi an talem tengkiu go long Yawe hu hemi holi.