Sams 93 - Pijin Bible

God nao hemi king (Toktok go long God.)

¹ !Lod Yawe, yu nao yu king! Ya, hae nem blong yu an paoa blong yu nao hemi mekem yu kamap king. Yu bin mekem disfala wol ya, wea hemi stap strong long ples blong hem an hemi no save muv.

² Lod Yawe, bifoa yu mekem evrisamting long disfala wol, yu bin King finis Yu nao yu king hu hemi stap olowe.

³ Lod Yawe, noes blong rafsi long komburu hemi bikfala tumas. Ya, olketa barava meknoes fogud wea mifala fraetem tumas.

⁴ Bat yu nao yu rul long heven, an yu hae moa winim noes blong rafsi. Ya, paoa blong yu hemi strong moa winim paoa blong rafsi.

⁵ Lod Yawe, olketa lo blong yu hemi stap olowe nao. An Tambuhaos blong yu hemi holi tumas, an bae hemi stap olsem olowe nao.