Sams 91 - Pijin Bible

God hemi gadem yumi (Toktok go long olketa pipol.)

^1-2 Yawe hemi hae tumas, an hemi garem evri paoa. Eniwan wea God hemi gadem, an hemi trastem God fo lukaftarem hem gudfala, hemi save tok olsem, “Yu nao yu God blong mi wea mi trastem. Yu nao yu lukaftarem mi, an yu gadem mi.”

³ God bae hemi gadem yu from olketa nogud trap wea i staphaed, an bae hemi sevem yu from ravis sik wea hemi save kilim man dae.

⁴ Bae hemi lukaftarem yu gudfala olsem wea mami kokorako hemi kavaremap gudfala olketa pikinini blong hem andanit long wing blong hem. An bae hemi kipim promis blong hem fo lukaftarem yu an gadem yu.

⁵ Long naet, bae yu no save fraetem olketa devol, an long de, bae yu no save fraetem olketa nogud pipol wea i kam fo kilim yu dae.

⁶ Bae yu no save fraetem olketa ravis devol wea i save kasem man long tudak, an yu no save fraetem enisamting wea i gohed fo kilim man dae long delaet.

⁷ Maet 1,000 pipol wea i stap kolsap long yu, i save foldaon nomoa an dae nao. Ya, maet 10,000 pipol wea i stap raonem yu i save dae evriwan, bat bae olketa nogud samting ya i no save kasem yu.

⁸ Bae yu barava lukim long ae blong yu, taem God hemi panisim olketa nogud pipol ya.

⁹ Yawe nao hemi hae tumas, an bikos yu trastem hem bae hemi gadem yu, an hemi lukaftarem yu gudfala.

¹⁰ So bae no eni nogud samting save kam fo spoelem yu, an no eni ravis sik save kam kolsap long ples blong yu.

¹¹ Yawe bae hemi putum olketa enjel blong hem fo lukaftarem yu, an fo gadem yu long evri ples wea yu go.

¹² Bae olketa karim yu long han blong olketa, an liftim yu goap, mekem yu no save bangam lek blong yu long olketa ston.

¹³ Bae yu save step nomoa long olketa wael animol an olketa poesen snek. Ya, nomata olsem no eni nogud samting save spoelem yu.

¹⁴ God hemi tok olsem, “Bae mi sevem olketa hu i lavem mi. Ya, bae mi gadem olketa bikos olketa talemaot dat mi nao Yawe.

¹⁵ Taem olketa kol kam long mi, bae mi ansarem olketa. An bae mi stap wetem olketa taem trabol hemi kasem olketa. Ya, bae mi aotem olketa from trabol, an bae mi givim biknem long olketa.

¹⁶ Bae mi sevem olketa, an givim longfala laef long olketa wea hemi gud tumas.” (Singsing fo singim long Sabat de.)