Sams 90 - Pijin Bible

(Toktok go long God.)

¹ Masta, stat kam long bifoa ka-kam kasem tude, yu nao yu olsem hom blong mifala.

² God, bifoa long taem wea yu wakem disfala wol an yu no mekem olketa maonten yet, yu bin stap olowe finis. Yu nao yu God, an bae yu gohed fo stap olowe nao.

³ Oltaem, taem mifala dae yu mekem mifala fo gobaek moa long graon. Ya, yu mekem mifala fo tane go moa long graon wea yu bin wakem mifala long hem.

⁴ Long yu, 1,000 yia hemi olsem nomoa wanfala de, hemi olsem yestade wea hemi gopas finis, an hemi olsem wan aoa long naet, wea hemi gopas kuiktaem nomoa.

⁵ Yu mekem mifala dae kuiktaem nomoa. Ya, mifala stap fo lelebet taem olsem wanfala drim nomoa. Mifala olsem nomoa gras wea hemi grou olobaot.

⁶ Long moning, hemi garem flaoa, bat long ivining, flaoa ya hemi dae an hemi foldaon nao.

⁷ Kros blong yu nao hemi spoelem mifala. Ya, mifala fraet tumas taem yu kros long mifala.

⁸ Yu lukim nomoa olketa sin blong mifala. Ya, nomata olketa sin wea mifala trae fo haedem, yu save lukim nomoa.

⁹ Taem yu kros, yu sotem nomoa laef blong mifala. Mifala save dae kuiktaem nomoa olsem lelebet win wea hemi kamaot long maos blong man.

¹⁰ Laef blong mifala save kasem seventi yia nomoa, o sapos bodi blong mifala hemi strong bae mifala save kasem eiti yia. Nomata olsem, plande trabol an sore nomoa save kasem mifala. Ya, no long taem nomoa mifala dae nao.

¹¹ No eniwan nao hemi save luksave long paoa blong disfala kros blong yu long mifala. Ya, no eniwan hemi save luksave long fraet wea bae hemi kasem mifala taem yu kros long mifala.

¹² Plis yu mekem mifala fo save dat laef blong mifala hemi sot nomoa, mekem mifala tingting gudfala abaotem olketa wei blong yu.

¹³ ?Lod Yawe, fo hao long nao bae yu gohed fo kros nomoa long mifala? Plis yu sore kam long mifala olketa wakaman blong yu.

¹⁴ Evri moning, plis yu mekem mifala save dat lav blong yu fo mifala hemi no save finis. Sapos olsem, bae mifala save singsing an hapi olowe nao.

¹⁵ Plis yu mekem mifala hapi moa, fo sensim bikfala sore wea hemi bin kasem mifala bifoa long olketa yia wea mifala bin stap kam long trabol wea hemi kam from yu.

¹⁶ Mifala olketa wakaman blong yu ya. Plis yu letem mifala lukim olketa bikfala waka blong yu. Ya, letem olketa wea bae i bon kam long laen blong mifala i lukim bikfala paoa blong yu.

¹⁷ God, yu nao yu Masta blong mifala, plis yu blesim mifala. Plis yu mekem evrisamting wea mifala duim fo kamap gudfala.