Sams 88 - Pijin Bible

(Toktok go long God.)

¹ Lod Yawe, yu nao yu God blong mi hu hemi sevem mi. Long de an long naet, mi gohed fo sore an krae bikfala go long yu mekem yu helpem mi.

² Hemi gud sapos yu herem kam prea blong mi. Mi krae kam long yu fo yu helpem mi, so plis yu lisin kam long mi.

³ Plande trabol nao hemi kasem mi, an mi kolsap dae nao.

⁴ Distaem mi no strong nao, an evriwan i tingse mi olsem wanfala long olketa hu i kolsap dae nao.

⁵ Olketa pipol i lukim mi olsem man hu hemi dae finis. Ya, mi olsem olketa man hu i dae long faet an olketa berem olketa insaet long wanfala grev nomoa. Yu fogetem olketa finis an yu no helpem olketa moa.

⁶ Yu bin torowem mi finis insaet long grev blong olketa man wea i dae finis. Ples ya hemi barava tudak an hemi dip fogud tu.

⁷ Kros blong yu fo mi hemi barava hevi tumas long mi. Ya, hemi barava spoelem mi nao olsem wea olketa wev i kavarem mi finis.

⁸ Yu bin mekem olketa fren blong mi fo lusim mi nao. Ya, yu bin mekem olketa fo barava les long mi nao. Yu bin kipim mi insaet long olketa trabol ya an mi no save ranawe nao.

⁹ Mi safa tumas, an mi krae go-go tufala ae blong mi i no lukluk gud nao. Lod Yawe, evri de nomoa mi kol go long yu, an mi liftimap han blong mi fo prea long yu.

¹⁰ ?Waswe, olketa mirakol ya wea yu mekem, yu tingse bae olketa man hu i dae finis i save lukim? !Olketa man hu i dae finis i no save stanap moa fo preisim yu ya!

¹¹ ?Waswe, bae olketa hu i dae finis save tokabaotem moa disfala wei blong yu fo tinghevi long pipol? Olketa hu i dae finis i no save kipim moa olketa promis blong yu insaet long grev.

¹² Olketa ya i stap long ples wea hemi tudak an no eniwan save tingim nao. So olketa no save lukim moa olketa gudfala wei blong yu an olketa mirakol blong yu.

¹³ Lod Yawe. Nomata olsem, evri moning nomoa mi prea go long yu, an mi krae go long yu fo yu helpem mi.

¹⁴ ?Lod Yawe, waswe nao yu les long mi? ?Waswe nao yu no save luk kam moa long mi?

¹⁵ Stat long taem wea mi yangfala yet, ka-kam kasem tude, mi bin safa olowe nomoa from disfala sik, an kolsap fo mi dae nao. Yu bin panisim mi bikfala tumas, so mi barava wikdaon fogud.

¹⁶ Yu barava kros tumas long mi, so tingting blong mi hemi barava wikdaon nao. Ya, wei wea yu bin panisim mi hemi spoelem mi finis.

¹⁷ Stat long moning go-go kasem tudak mi safa tumas from sik ya. Ya, hemi olsem wata wea hemi flad an hemi kavarem mi finis.

¹⁸ Yu bin mekem olketa gudfala fren blong mi an olketa wantok tu fo lusim mi. Distaem mi no garem eni fren nao, so mi we-weit nomoa fo dae. (Singsing blong Etan hu hemi long laen blong Esra.)