Sams 87 - Pijin Bible

(Toktok go long olketa pipol.)

¹ Yawe hemi wakem taon blong hem antap long holi maonten long Saeon.

² Hemi lavem Jerusalem winim eni narafala taon moa long Israel.

³ Olketa barava gudfala toktok nao, bae olketa talem abaotem taon ya.

⁴ God hemi tok olsem, “Taem mi kaontem olketa kantri wea olketa pipol long hem i save long mi, bae mi kaontem pipol long Ijip wetem Babilonia, an olketa pipol long Filistia, an olketa blong Taea, an Itiopia. Olketa ya nao bae mi kaontem olketa wetem yufala long Jerusalem, olsem wea yufala i wantok nomoa.”

⁵ An bae olketa tok olsem abaotem Saeon, “Olketa pipol long evri kantri i kamaot nomoa from disfala ples ya.” Yawe hu hemi hae tumas, bae hemi mekem pipol long taon ya i strong.

⁶ God bae hemi raetemdaon nem blong olketa pipol long wanfala buk, an bae hemi kaontem olketa evriwan, olsem olketa i barava pipol blong Jerusalem.

⁷ Nao olketa gohed fo dans, an olketa gohed fo singsing olsem, “Gudfala ples blong yumi nao long Saeon.” (Singsing blong laen blong Kora. Heman hu hemi long laen blong Esra hemi wakem.)