Sams 86 - Pijin Bible

(Toktok go long God.)

¹ Lod Yawe, plis yu herem kam prea blong mi, bikos mi no strong an mi no garem enisamting.

² Plis yu sevem mi from dae, bikos mi tinghevi long yu. Yu nao yu God blong mi. Plis yu gadem mi bikos mi nao wakaman blong yu hu mi trastem yu.

³ Oltaem nomoa, stat long moning go-go kasem tudak, mi gohed fo prea go long yu, so plis yu sore kam long mi.

⁴ Masta, plis yu mekem mi hapi, bikos mi wakaman blong yu ya, an mi prea go long yu nomoa.

⁵ Lod Yawe, yu gud tumas, an yu gohed fo fogivim olketa sin blong mi. An yu lavem tumas olketa hu i prea go long yu.

⁶ Lod Yawe, plis yu herem kam prea blong mi. Ya, plis yu herem mi taem mi krae kam long yu fo yu helpem mi.

⁷ Mi kol kam long yu long olketa taem wea trabol hemi kasem mi, bikos mi save dat yu ansarem olketa prea blong mi.

⁸ Masta, no eni narafala god moa hemi olsem yu. Bikos no eniwan long olketa hemi save duim olketa gudfala waka olsem yu.

⁹ Yu nao yu mekem evri pipol long evri kantri, bae olketa kam an baodaon long yu fo preisim hae nem blong yu.

¹⁰ Yu nomoa yu God. Ya, yu garem evri paoa, an yu save duim evri bikfala samting.

¹¹ Lod Yawe, plis yu tisim mi olketa samting wea yu laekem mi fo duim, mekem mi save obeim trutoktok blong yu. Ya, plis yu mekem mi fo barava wanmaen nomoa fo tinghae long yu.

¹² God, yu nao yu Masta blong mi. Bae mi preisim yu long evri tingting blong mi, an bae mi liftimap hae nem blong yu olowe nao.

¹³ Lav blong yu fo mi hemi bikfala tumas. Ya, yu bin sevem mi from dae.

¹⁴ God, olketa praod pipol i agensim mi nao. Ya, wanfala grup long olketa nogud pipol hu i nating save lisin long yu, olketa nao i trae fo kilim mi dae.

¹⁵ Bat Masta, yu nao yu God hu hemi save sore tumas long pipol, an hemi save lavem olketa tumas. Ya, yu barava kaen tumas an yu no save kros kuiktaem, an yu save kipim olketa promis blong yu olowe.

¹⁶ Plis yu luk kam long mi an yu sore long mi. Ya, plis yu, mekem mi strong an yu sevem mi, bikos mi nao mi wakaman blong yu, olsem wea mami blong mi hemi bin duim bifoa.

¹⁷ Lod Yawe, plis yu somaot long mi dat yu saet wetem mi. Sapos olsem, taem yu helpem mi, an yu strongim tingting blong mi, olketa hu i heitem mi bae i barava sem fogud. (Singsing blong laen blong Kora.)