Sams 84 - Pijin Bible

(Toktok go long God.)

¹ !Lod Yawe hu hemi garem evri paoa, mi laekem tumas Tambuhaos blong yu!

² !Mi laekem tumas fo stap long hem! Lod Yawe, mi laekem tumas fo stap insaet long Tambuhaos blong yu ya. Yu nao yu God hu hemi laef. Long ful laef blong mi, mi singsing bikos mi barava hapi tumas long yu.

³ Lod Yawe, yu garem evri paoa. Yu nao yu King blong mi, an yu God blong mi. Nomata olketa smolfala bed, olketa save mekem nest blong olketa insaet long Tambuhaos blong yu, an olketa kipim olketa pikinini blong olketa kolsap long olta blong yu.

⁴ Olketa pipol hu i stap long Tambuhaos blong yu olketa ya nao i hapi, an oltaem olketa preisim yu long olketa singsing.

⁵ Olketa pipol hu i stap sef long yu, olketa nao i hapi tumas. Olketa laekem tumas fo kamap long maonten long Saeon fo wosipim yu.

⁶ Taem olketa gotru long vali wea hemi barava drae fogud, hemi olsem nomoa ples wea hemi garem plande wata long hem. Bikos ren hemi mekem olketa hol long drae vali ya fo fulap finis long wata.

⁷ Taem olketa pipol ya i stap long Saeon, olketa kamap strong moa, bikos olketa bae lukim yu God hu hemi hae tumas long olketa narafala god wea yu stap long ples ya.

⁸ Lod Yawe, yu nao yu God blong olo blong mifala Jekob an yu garem evri paoa, plis yu lisin kam long mi. Ya, plis yu herem kam prea blong mi.

⁹ God, yu nao yu siusim disfala king blong mifala. !Plis yu blesim hem!

¹⁰ God blong mi, sapos mi stap fo wanfala de nomoa insaet long Tambuhaos blong yu, hemi moabeta winim sapos mi stap fo 1,000 de long eni narafala ples. Nomata mi stanap nomoa long doa blong Tambuhaos blong yu, hemi moabeta winim sapos mi stap insaet long haos blong olketa nogud pipol.

¹¹ Lod Yawe, yu nao yu God, an yu nao yu gadem mifala an mekem mifala fo stap sef long yu. Ya, yu nao yu kaen long mifala, an yu givim biknem long mifala. Lod Yawe, oltaem yu givim nomoa olketa gudfala samting long olketa hu i duim wanem hemi stret.

¹² Lod Yawe hu hemi garem evri paoa. Olketa hu i trastem yu, olketa ya nao i hapi tumas. (Singsing blong laen blong Kora.)