Sams 83 - Pijin Bible

(Toktok go long God.)

¹ !God, plis yu no stap kuaet nomoa olsem!

² !Yu lukim ya! Olketa enemi blong yu i agensim yu nao. Ya, olketa hu i heitem yu i agensim yu tu.

³ Olketa planem haed olketa ravis samting fo spoelem mifala olketa pipol blong yu Ya, olketa plan agensim mifala hu yu lavem tumas.

⁴ Olketa enemi ya i tok olsem, “!Yumi go nao mekem yumi spoelem finis kantri blong olketa ya! !Ya, mekem no eniwan save tingim Israel moa!”

⁵ Olketa wanmaen nao long plan blong olketa, an i joen tugeta nao fo agensim yu.

⁶ Olketa wea i joen tugeta nao i olsem, olketa laen blong Idom, an olketa laen blong Ismael, an olketa pipol long Moab, an olketa laen blong Hagri,

⁷ an olketa pipol long Gebal, an olketa laen blong Amon, an olketa laen blong Amalek, an olketa pipol long Filistia, an olketa pipol long Taea.

⁸ An olketa pipol long Asiria tu i joen wetem olketa, bikos olketa saet wetem olketa laen blong Amon an olketa pipol long Moab hu i laen blong Lot.

⁹ Plis yu winim olketa long faet olsem wea yu bin winim olketa pipol blong Midian bifoa, an olsem wea yu bin duim long tufala man ya Sisera an Jabin, long faet ya long Kison Riva.

¹⁰ Yu bin kilim dae tufala ya long taon long Endoa, an bodi blong tufala hemi roten long ples ya nao.

¹¹ Plis yu spoelem olketa lida blong olketa enemi ya olsem wea yu bin duim long tufala bikman ya Oreb an Seheb. Plis yu winim evri king blong olketa ya long faet olsem wea yu bin winim tufala king ya Seba an Salmuna.

¹² Olketa ya i bin tok olsem, “Bae yumi tekem graon ya blong God fo yumi.”

¹³ So plis God yu mekem olketa fo olsem dast o dae lif wea win hemi bloum go olobaot nomoa.

¹⁴ Spoelem olketa tumas olsem bikfala faea wea hemi bone long bus. Ya, olsem olketa bikfala flem blong faea wea hemi bonem evri tri long olketa hil.

¹⁵ Plis yu ronemaot olketa long bikfala saekloun. Ya, fraetem olketa long bikfala komburu.

¹⁶ Lod Yawe, plis yu mekem olketa sem fogud, mekem olketa luksave long paoa blong yu.

¹⁷ Hemi gud tumas sapos yu mekem olketa fo barava sem olowe nao, an hemi gud tumas sapos nem blong olketa hemi nogud tumas taem olketa dae.

¹⁸ Lod Yawe, hemi gud tumas sapos olketa save dat yu nao yu God hu hemi hae tumas, an yu nao yu King ovarem evri pipol long wol. (Singsing blong laen blong Kora.)