Sams 81 - Pijin Bible

(Toktok go long olketa pipol.)

¹ Yumi mas hapi an singaot go long God wea olketa pipol long laen blong Israel i wosipim. Ya, yumi mas singsing bikfala fo preisim God bikos hemi bin gadem yumi.

² Yumi mas singsing an pleim olketa tamborin an olketa gita. Ya, yumi mas pleim olketa samting ya mekem hemi barava here gudfala.

³ Long fist blong Niumun, an fist blong Fulmun, yumi mas bloum konsel fo statem wosip.

⁴ Hem ya nao lo wea God hemi givim long yumi olketa laen blong Israel, an lo ya nao yumi mas falom.

⁵ God hemi givim disfala lo long olketa olo blong yumi bifoa, long taem wea hemi kilim dae olketa pipol blong Ijip. Mi herem wanfala voes wea mi no save, hemi tok olsem,

⁶ “Mi nao mi tekemaot olketa hevi karikari from baeksaet blong yufala. Ya, mi nao mi mekem yufala fri from hadwaka ya long Ijip.

⁷ Taem trabol hemi kasem yufala, yufala kol kam long mi, an mi bin sevem yufala. Ya, mi nao mi bin helpem yufala taem mi kam insaet long tanda. Mi nao mi bin testem yufala insaet long drae eria long datfala springwata ya long Meriba.

⁸ “!Yufala olketa pipol blong mi long Israel, yufala mas lisin kam long mi! !Ya, mi laekem tumas fo yufala herem kam woning blong mi!

⁹ Yufala mas no mekhae long eni narafala god moa, an yufala mas no wosipim olketa narafala god ya.

¹⁰ Mi nao Yawe an mi God blong yufala, an mi nao mi bin tekem yufala kamaot from Ijip. Sapos yufala trastem mi, bae mi givim olketa gudfala samting fo yufala.

¹¹ “Olketa pipol blong Israel i blong mi ya, bat olketa nating lisin long mi, an i no obeim mi nao.

¹² So mi letem olketa gohed fo bikhed, an duim wanem olketa laekem.

¹³ Mi laekem tumas sapos olketa pipol blong mi i lisin long mi. Ya, mi laekem tumas sapos olketa falom wei blong mi.

¹⁴ Sapos olketa i olsem, bae mi faetem evri enemi blong olketa, an no longtaem bae mi save winim olketa ya nomoa.

¹⁵ Ya, sapos olketa pipol blong mi i gohed fo lisin long mi, bae mi mekem olketa hu i heitem mi fo fraet. An bae mi panisim olketa olowe nao.

¹⁶ Sapos olketa pipol blong mi ya i obeim mi, bae mi fidim olketa long barava nambawan kaikai, an bae mi mekem olketa barava hapi taem olketa kaikaim gudfala hani.” (Singsing blong Asaf.)