Sams 79 - Pijin Bible

(Toktok go long God.)

¹ God, olketa hiden pipol i faetem mifala an kam insaet finis fo tekova long lan ya wea yu bin givim long mifala. Ya, olketa spoelem finis Tambuhaos blong yu, an olketa brekemdaon finis taon ya long Jerusalem.

² Olketa no berem nomoa bodi blong olketa wakaman blong yu hu i dae finis. Olketa hiden pipol ya i lusim nomoa olketa bodi ya fo olketa wael animol an olketa bikfala bed fo kam kaikaim.

³ Olketa kilim dae olketa pipol blong yu, an blad blong olketa hemi ran olsem wata evriwea long Jerusalem. An no eniwan nao hemi stap fo berem olketa.

⁴ Olketa hiden pipol hu i stap raonem mifala i tokspoelem mifala, an olketa gohed fo la-laf an mekfan long mifala.

⁵ ?Lod Yawe, waswe, bae yu kros long mifala olowe nao? ?Waswe, bae yu letem kros blong yu fo mifala hemi hot olowe nomoa olsem faea?

⁶ Yu mas kros go long olketa hiden pipol long olketa narafala kantri hu i no save wosipim yu o prea long yu,

⁷ bikos olketa ya nao i bin kilim dae mifala pipol long laen blong Jekob, an olketa spoelem nao lan ya wea yu bin givim long mifala.

⁸ God, plis yu no panisim mifala fo olketa sin blong olketa olo blong mifala bifoa. Plis yu sore kam long mifala, bikos tingting blong mifala hemi barava wikdaon fogud nao.

⁹ God, plis yu helpem mifala an sevem mifala. Plis yu fogivim olketa sin blong mifala, mekem evriwan i tinghae long yu.

¹⁰ Hemi nogud taem olketa pipol long narafala kantri fo tok olsem long mifala, “?Wea nao God blong yufala ya?” God, mifala laekem tumas fo yu panisim olketa, bikos olketa bin kilim dae olketa wakaman blong yu.

¹¹ Plis yu herem kam krae blong mifala hu i stap long prisin. Olketa ya i jajem mifala finis fo dae. Plis yu sevem mifala long bikfala paoa blong yu.

¹² Masta, olketa pipol long olketa narafala kantri i tokspoelem yu. Plis yu panisim olketa olowe fo olketa ravis toktok ya.

¹³ Sapos olsem, mifala hu i olsem sipsip blong yu, bae mifala talem tengkiu long yu olowe nao. Ya, mifala preisim yu evritaem olowe. (Singsing blong laen blong Asaf.)