Sams 76 - Pijin Bible

(Toktok go long olketa pipol.)

¹ Long Jiuda olketa pipol i savegud long God. An long Israel olketa tinghae long nem blong hem.

² Ples blong hem nao long Jerusalem. Ya, hemi stap long maonten long Saeon.

³ Long ples ya nao, hemi bin brekem olketa aro blong olketa enemi blong hem. Ya, hemi bin spoelem evrisamting blong olketa fo faet.

(Toktok go long God.)

⁴ !God, yu barava hae tumas! Ya, yu hae tumas olsem wanfala king hu hemi winim olketa enemi long faet an hemi kambaek long bikfala paoa.

⁵ Yu bin kilim dae finis olketa strongman blong olketa enemi ya, an yu bin tekem finis evrisamting blong olketa. Olketa paoa an save blong olketa hemi nogud tumas nao.

⁶ God blong Jekob, long taem wea yu tokstrong long olketa, olketa hos blong olketa wetem olketa man wea i raedem olketa hos ya, i foldaon an dae finis nao.

⁷ God, evriwan i fraetem yu. Taem wea yu kros, no eniwan save stanap fo fesim yu.

^8-9 Yu stap long heven, an yu mekem evriwan long wol fo savegud long tingting blong yu. Dastawe nao, taem yu jajem evri pipol, an fo sevem olketa hu i safa, evriwan long wol i fraet, an stap kuaet.

¹⁰ Yu finisim kros blong olketa enemi blong yu, hem nao bae mekem evriwan fo mekhae long yu. Ya, nomata lelebet kros nomoa hemi stap yet long olketa bae yu barava finisim.

(Toktok go long olketa pipol.)

¹¹ Yawe hemi God blong yumi wea evriwan mas fraetem. Yufala evriwan long evri kantri wea i stap kolsap long Israel mas givim go olketa samting wea yufala bin promisim fo givim long hem. An yufala mas tekem kam olketa presen long hem.

¹² Hemi daonem tingting blong olketa bikman hu i praod tumas. Ya, hemi mekem olketa king fo fraetem hem. (Singsing blong Asaf. Hemi wakem fo Jedutun hu hemi lida blong kuaea.)