Sams 70 - Pijin Bible

(Toktok go long God.)

¹ God, plis yu sevem mi. Lod Yawe, kam kuiktaem fo helpem mi.

² Hemi gud tumas, fo yu winim olketa wea i traehad fo kilim mi dae, an yu mekem olketa fo luk krangge. Hemi gud tumas, fo yu ronem olketa wea i hapi bikos trabol hemi kasem mi, an yu mekem olketa fo barava sem fogud.

³ Hemi gud tumas, fo yu mekem olketa wea i mekfan long mi fo olketa lus, Ya, hemi gud fo yu mekem tingting blong olketa hemi godaon finis bikos olketa lus.

⁴ Bat evriwan hu i kam long yu, hemi gud tumas fo yu mekem olketa hapi olowe. Olketa hu i talem tengkiu long yu, bikos yu sevem olketa, hemi gud tumas fo olketa ya fo tok olsem olowe, “!God nao, hemi hae tumas!”

⁵ God, plis yu kam kuiktaem long mi, bikos mi pua, an mi no garem enisamting nao. So, Lod Yawe, plis yu kam kuiktaem fo helpem mi, bikos yu nomoa save sevem mi.