Sams 7 - Pijin Bible

(Toktok go long God.)

¹ Lod Yawe, yu nao yu God blong mi, an mi kam fo stap sef long yu. Plis yu sevem laef blong mi from olketa enemi blong mi ya.

² Sapos nomoa, bae olketa enemi ya i brekem bodi blong mi long olketa smolfala pisis, olsem wanfala laeon, o bae olketa pulum mi go long narafala ples, an no eniwan save sevem mi nao.

³ Lod Yawe, yu nao yu God blong mi. Sapos mi duim eni nogud samting long eniwan,

⁴ o sapos mi duim eni nogud samting long fren blong mi, o sapos mi tekem nating enisamting from enemi blong mi,

⁵ oraet, sapos hemi olsem, letem olketa enemi blong mi i ronem mi an kasholem mi nao, an letem olketa kilim mi an letem mi dae nao.

⁶ Lod Yawe, kam an helpem mi. Olketa enemi blong mi i kros tumas long mi. Plis yu kam an stopem olketa. Yu mas kros long olketa an yu mas agensim olketa. Tokstrong long olketa, an talem olketa fo stap long wei wea hemi stret.

⁷ Plis yu tekem evri pipol fo kam tugeta long yu, an bae yu nao yu stap long antap an yu rulim olketa evriwan.

⁸ Lod Yawe, yu nao save jajem evri pipol. Plis yu jajem mi falom wei wea mi stret nomoa long ae blong yu, an mi no save laea.

⁹ Yu God nao yu stret tumas, an yu luksave long olketa tingting blong mifala an olketa samting wea mifala laekem. So plis yu stopem olketa ravis wei blong olketa nogud pipol ya, an givim gudfala samting long olketa pipol hu i duim olketa gudfala samting.

(Toktok go long olketa pipol.)

¹⁰ God hemi gohed fo gadem mi olsem wanfala sil wea hemi stopem aro fo no kasem man. An hemi gohed fo sevem olketa pipol hu i obeim hem.

¹¹ God hemi wanfala stretfala jaj ya. An oltaem hemi gohed fo panisim olketa nogud pipol.

¹² Sapos olketa nogud pipol ya i no sensim wei blong olketa, bae God hemi sapanem naef blong hem fo faet, fo kilim olketa dae. An bae hemi taetem string long bou blong hem fo hemi sutim olketa.

¹³ Hemi mekredi finis long olketa samting blong hem fo faet. An hemi pulum redi finis olketa aro wea i garem faea long en blong olketa.

¹⁴ !Yufala lukim! Olketa nogud pipol ya i gohed fo tingting nomoa long olketa ravis samting. Olketa gohed nomoa fo planem trabol, an fo laea long olketa narafala pipol.

¹⁵ Olketa trap wea olketa mekem redi fo olketa narafala pipol, olketa seleva nomoa i foldaon insaet.

¹⁶ So olketa ravis wei blong olketa ya nao i gohed fo kasem olketa moa, an olketa wei blong olketa fo spoelem narafala pipol, hem nomoa i spoelem olketa seleva moa.

¹⁷ Bae mi gohed fo singsing fo preisim Yawe, hu hemi hae tumas. An bae mi gohed fo talem tengkiu long hem, bikos hemi gohed fo jaj long stretfala wei. (Singsing blong Deved.)