Sams 66 - Pijin Bible

Singsing fo talem tengkiu long God (Toktok go long olketa pipol.)

¹ !Yumi evriwan mas hapi an singaot fo preisim God!

² !Ya, yumi mas singsing fo liftimap biknem blong hem! !An yumi mas preisim fo barava mekhae long hem!

³ Yumi mas tok olsem long God, “Olketa samting wea yu duim i barava nambawan fogud. Ya, paoa blong yu hemi bikfala tumas, wea hemi mekem olketa enemi blong yu i fraet fogud, so olketa ya i baodaon long yu.

⁴ Evriwan long wol nao i wosipim yu, an olketa singsing fo preisim yu. Ya, olketa singsing fo mekhae long nem blong yu.”

⁵ Yufala evriwan kam an lukim olketa samting wea God hemi bin duim. Ya, yufala lukim olketa nambawan samting wea hemi bin duim fo olketa pipol.

⁶ Hemi mekem si fo divaed long tufala haf, an ples ya hemi kamap drae, an hemi mekem riva fo drae, nao olketa grani blong yumi bifoa i wakabaot nomoa fo katkros go long narasaet. Hem nao yumi hapi tumas long samting ya wea hemi bin duim.

⁷ Bae God hemi rul olowe long bikfala paoa blong hem, an bae hemi gohed fo lukluk long olketa pipol long olketa kantri, nogud samfala long olketa i trae fo agensim hem.

⁸ Evriwan long evri kantri, yufala mas preisim God blong mifala. Ya, letem evriwan herem taem yufala preisim hem.

⁹ Hemi gohed fo lukaftarem laef blong mifala, an hemi no letem olketa enemi fo winim yumi.

(Toktok go long God.)

¹⁰ God, yu bin testem mifala finis fo mekem laef blong mifala klin, olsem man wea hemi bonem silva fo tekemaot ravis long hem.

¹¹ Yu letem mifala foldaon nomoa insaet long trap, an yu mekem mifala fo karihevi tumas.

¹² Yu letem nomoa olketa enemi blong mifala fo step long mifala, an mifala bin gotru long bikfala hadtaem an trabol, wea hemi olsem bikfala faea, an hemi olsem wata wea hemi ran. Bat distaem, yu tekem mifala kambaek nao long sefples.

¹³ Bae mi bonem olketa sakrifaes go long yu insaet long Tambuhaos blong yu. Ya, bae mi ofarem go olketa samting wea mi bin promisim finis long yu.

¹⁴ Bae mi givim go long yu, olketa samting wea mi bin talem taem wea trabol hemi kasem mi.

¹⁵ Bae mi bonem olketa smolfala sipsip wea i fat fogud antap long olta blong yu. An bae mi bonem olketa sipsip, mekem smok blong olketa hemi goap long yu. Ya, bae mi bonem olketa buluka an olketa nanigot fo mekem sakrifaes go long yu.

(Toktok go long olketa pipol.)

¹⁶ Evriwan wea yufala tinghae long God, yufala kam an lisin. Bae mi talemaot long yufala olketa samting wea hemi bin duim fo mi.

¹⁷ Mi prea go long hem an mi preisim hem long olketa singsing.

¹⁸ Sapos mi haedem olketa sin blong mi, bae Masta hemi no save lisin long mi.

¹⁹ Bat mi bin talemaot finis long God, an hemi lisin long prea blong mi. Ya, hemi herem olketa toktok blong mi nao, taem mi prea.

²⁰ Oltaem mi mas preisim God bikos hemi no save les long prea blong mi, an hemi gohed olowe fo tinghevi long mi. (Singsing ya hemi fo singim wetem stringban.)