Sams 65 - Pijin Bible

(Toktok go long God.)

¹ God, hemi stret fo mifala preisim yu long Saeon, Ya, hemi gud fo mifala kipim olketa promis blong mifala long yu,

² bikos oltaem, yu ansarem olketa prea blong mifala. Evriwan long evri ples bae i kam fo mekem sakrifaes go long yu,

³ fo olketa sin blong olketa. Olketa nogud wei blong mifala hemi winim mifala nao, bat yu fogivim nomoa olketa sin blong mifala ya.

⁴ Evriwan wea yu siusim, an yu tekem olketa kam long Tambuhaos blong yu, olketa ya nao i hapi. Bae mifala i hapi an fulap long olketa gudfala samting long haos blong yu. Ya, bae mifala barava hapi long olketa blesing wea yu givim mifala insaet long Tambuhaos blong yu.

⁵ Taem mifala krae go long yu, yu barava ansarem mifala nao. Yu mekem mifala win, an yu duim olketa gudfala samting fo sevem mifala Olketa pipol long evri ples long wol i trastem yu. Ya, olketa pipol long olketa farawe aelan i trastem yu tu.

⁶ Long paoa blong yu, yu bin stanemap olketa bikfala maonten. Long wei ya, yu somaot dat yu garem evri paoa.

⁷ Yu mekem olketa raf si fo kuaet, an yu stopem noes blong olketa bikfala si. An yu mekem tu olketa pipol fo kuaet an no ra-raoa.

⁸ Evriwan long evri ples long wol, olketa seke long olketa bikfala samting wea yu bin duim, Olketa samting wea yu bin duim, hemi mekem evriwan i hapi an singaot fo preisim yu. Hemi stat long wanfala saet long wol go-go kasem long narasaet.

⁹ Yu somaot dat yu lukaftarem disfala wol ya, bikos yu gohed fo sendem kam ren, an yu mekem graon ya fo hemi kamap gudfala. Yu fulumap olketa riva wetem wata, an yu mekem graon fo garem plande kaikai. Hem nao wei wea yu mekem.

¹⁰ Yu gohed fo sendem kam ren long olketa gaden wea olketa pipol i plantem finis, mekem graon hemi tuwet. Ya, yu mekem graon hemi sof long ren, an yu mekem olketa samting fo grou.

¹¹ Bikos yu gud tumas, yu mekem graon fo garem plande gudfala kaikai long hem olowe. Evri ples wea yu go long hem, yu givim plande kaikai.

¹² Olketa fil i fulap long gudfala gras, wea hemi fitim staka sipsip fo kaikai long hem, an evrisamting long olketa hil i barava hapi.

¹³ Ya, olketa hil i fulap fogud long olketa sipsip, an olketa gaden long olketa vali i fulap fogud tu long kaikai. Evrisamting long evri ples, i gohed fo singaot, olketa gohed fo singsing bikos olketa hapi tumas.