Sams 64 - Pijin Bible

(Toktok go long God.)

¹ God, trabol hemi kasem mi nao, plis yu lisin kam long prea blong mi. Mi fraetem tumas olketa enemi blong mi, plis yu sevem laef blong mi.

² Plis yu gadem mi, nogud olketa ravis samting wea olketa planem i kasem mi. Yu no lego long mi long han blong olketa ravis pipol ya.

³ Toktok blong olketa i save spoelem man, olsem naef fo faet wea hemi barava sap fogud, an olketa makem pipol fo sutim olketa wetem olketa ravis toktok ya olsem olketa aro.

⁴ Olketa haed fo sutim olketa gudfala pipol long olketa laea toktok blong olketa. Ya, olketa nating fraet nomoa fo spoelem olketa gudfala pipol long olketa ravis toktok blong olketa.

⁵ Olketa ya i strongim tingting blong olketa seleva long olketa ravis plan blong olketa. Olketa planem olketa ples wea bae olketa mekem olketa trap blong olketa ya, an olketa tingse no eniwan hemi luksave long olketa, taem olketa mekem olketa trap ya.

⁶ Olketa barava planem gudfala long olketa nogud samting ya, an olketa talem dat no eniwan hemi luksave long plan ya. Bat wea, yu nomoa God yu luksave long evri tingting blong evriwan.

(Toktok go long olketa pipol.)

⁷ Bae God hemi panisim olketa kuiktaem nomoa. Ya, hemi olsem wea hemi sutim olketa long olketa aro blong hem, an seknomoa olketa garekil nao.

⁸ Bae God hemi barava spoelem olketa bikos olketa talem olketa ravis toktok. An evriwan wea i lukim olketa ya, bae i mekfan long olketa.

⁹ Olketa evriwan ya bae i fraet, an bae olketa jes save nao wanem God hemi bin duim, an bae olketa tokabaotem olketa samting wea hemi bin duim.

¹⁰ Evri stretfala pipol bae i hapi fogud long wanem Yawe hemi bin duim. Ya, bae olketa save faendem sefples long hem, an evri gudfala pipol ya bae i preisim hem. (Singsing blong Deved.)