Sams 63 - Pijin Bible

(Toktok go long God.)

¹ God, yu nao yu God blong mi. Mi laekem tumas fo yu stap olowe wetem mi insaet long laef blong mi. Mi filim laef blong mi hemi olsem graon wea hemi barava drae fogud, an hemi nating garem eni wata, hem nao mi laekem yu tumas.

² Plis yu letem mi lukim yu long Tambuhaos blong yu. Mi laekem tumas fo lukim bikfala paoa blong yu, an wei wea paoa ya hemi soaot.

³ Bikfala lav blong yu fo mi ya hemi gudfala moa winim laef. Dastawe nao, bae mi mas preisim yu.

⁴ Bae mi gohed fo tengkiu long yu oltaem long laef blong mi. An bae mi liftimap han blong mi taem mi prea long yu.

⁵ Bae mi hapi tumas long yu, olsem wea mi hapi tumas long taem blong fist. Nao bae mi singim olketa hapi singsing fo preisim yu.

⁶ Taem mi leidaon long bed, oltaem mi save tingim yu. Stat long ivining go-go kasem moning mi tingim yu olowe nomoa,

⁷ bikos yu nao bin helpem mi olowe. Mi faendem sefples long yu olsem wea pikinini blong kokorako hemi haed andanit long wing blong mami blong hem. Dastawe nao mi hapi, an mi gohed fo singsing.

⁸ Mi holestrong long yu, an strongfala han blong yu hemi gadem mi

⁹ Bat olketa hu i trae fo kilim mi dae, bae olketa godaon long disfala nogud ples blong olketa pipol hu i dae finis.

¹⁰ Bae olketa ya i dae long faet, an bae olketa wael dog nao i kaikaim bodi blong olketa.

¹¹ God, mi nao king, an bae mi hapi tumas bikos yu mekem mi win. Olketa hu i mekem promis long nem blong yu, bae olketa preisim yu, bat bae yu satem maos blong olketa pipol hu i laea, mekem olketa no laea moa. (Singsing blong Deved.)