Sams 61 - Pijin Bible

(Toktok go long God.)

¹ God, plis yu herem kam krae blong mi, an lisin kam long prea blong mi.

² Mi stap farawe tumas from ples blong mi, an tingting blong mi hemi wikdaon nao, hem nao mi kol go long yu. Plis yu tekem mi go long wanfala strongfala sefples,

³ bikos yu nao yu lukaftarem mi olowe, an yu gadem mi from olketa enemi.

⁴ Plis yu letem mi stap long Tambuhaos blong yu oltaem long laef blong mi, an yu haedem mi olsem wea kokorako hemi haedem olketa pikinini blong hem andanit long wing blong hem.

⁵ God, yu bin herem finis olketa promis blong mi, an olketa blesing wea yu bin makem fo olketa hu i tinghae long yu, yu bin givim finis long mi tu.

⁶ Plis yu mekem king blong mifala fo garem longfala laef. Ya, hemi gud tumas sapos hemi laef fo longtaem.

⁷ God, hemi gud tumas sapos yu blesim king ya fo hemi rul olowe. Plis yu tinghevi long hem, an gadem hem long wei wea yu kipim promis blong yu olowe.

⁸ Oltaem, taem mi gohed fo ofarem go olketa sakrifaes wea mi bin promisim long yu, bae mi singsing fo preisim yu. (Singsing blong Deved.)