Sams 60 - Pijin Bible

(Toktok go long God.)

¹ God, yu les finis long mifala, an yu bin mekem mifala fo lus long faet. Bifoa, yu bin kros long mifala, bat distaem, plis yu kambaek moa long mifala.

² Bifoa, hemi olsem wea yu mekem graon fo seksek, an yu bin brekem fo open bikfala. Distaem, plis yu mekem hemi gudbaek moa, bikos hemi stat fo foldaon long pisis nao.

³ Mifala olketa pipol blong yu, i safa fogud ya, Hemi olsem yu givim waen long mifala an mifala dringim tumas nao, an waen ya hemi panis blong yu fo mifala.

⁴ Yu bin givim kam long mifala hu i tinghae long yu, wanfala saen olsem flag fo wonem pipol, mekem mifala save ranawe long hem, fo kamap sef from olketa enemi.

⁵ Yu lavem mifala tumas, so plis sevem mifala wetem bikfala paoa blong yu, an ansarem kam prea blong mifala, mekem mifala stap gudfala.

(Toktok go long olketa pipol.)

⁶ God hemi stap long Tambuhaos blong hem, hemi tok olsem, “Taem mi win, bae mi divaedem lan ya long Sekem go long olketa pipol blong mi, an bae mi makem olketa haf long vali long Sukot fo givim gobaek long olketa.

⁷ Eria ya long Gilead hemi blong mi, an eria ya long Manase hemi blong mi tu. Eria ya long Efrem hemi olsem helmet fo faet blong mi, an eria ya long Jiuda hemi olsem stik blong king fo somaot dat mi nao mi garem paoa fo rul.

⁸ An bae mi yusim kantri long Moab olsem besin fo wasim lek blong mi, an bae mi rul ovarem kantri long Idom. Mi singaot bikos mi winim kantri long Filistia long faet.”

(Toktok go long God.)

⁹ ?God, hu nao bae hemi lidim mifala fo go long kantri long Idom? ?Hu nao bae hemi tekem mifala fo go insaet long taon blong olketa ya wea i strong tumas?

¹⁰ ?Waswe, hemi tru wea yu lusim mifala finis? ?Waswe, hemi tru wea bae yu no go wetem olketa soldia blong mifala fo faet?

¹¹ Plis yu helpem mifala fo agensim olketa enemi blong mifala, bikos olketa help wea olketa pipol i save givim long mifala hemi yusles nomoa.

(Toktok go long olketa pipol.)

¹² Taem God hemi stap wetem yumi, bae yumi save win, bikos bae hemi save winim olketa enemi blong yumi. (Singsing blong Deved. Hem nao fo singim wetem stringban.)