Sams 6 - Pijin Bible

(Toktok go long God.)

¹ Lod Yawe, taem yu kros, plis no tokstrong kam long mi. Nomata yu kros tumas long mi, plis no panisim mi.

² Lod Yawe, plis yu sore kam long mi, bikos mi barava wik fogud. Plis yu mekem mi strong moa, bikos mi barava taet fogud nao.

³ ?Lod Yawe, fo hao long nao bae yu weit, bifoa yu save helpem mi? Ful laef blong mi, hemi barava nogud tumas nao.

⁴ Lod Yawe, lav blong yu hemi bikfala tumas, plis yu kam an sevem mi.

⁵ Long disfala nogud ples blong olketa pipol wea i dae finis, no eniwan i save tingim yu. An long ples ya tu, no eniwan i save preisim yu.

⁶ Mi barava sore fogud long taem wea mi krae. Evri naet, long taem ya wea mi krae, bed wetem pilo blong mi i tuwet fogud nao, long tias blong mi.

⁷ Olketa enemi blong mi nao i gohed fo mekem mi krae tumas ya, dastawe nao tufala ae blong mi i boela an mi no save lukluk gudfala nao.

(Toktok go long olketa pipol.)

⁸ Yufala evri nogud pipol, yufala giraot from mi, bikos Yawe bin herem finis krae blong mi nao.

⁹ Hemi herem finis taem mi krae go long hem fo hemi helpem mi, an bae hemi ansarem kam prea blong mi.

¹⁰ Yawe bae hemi ronem olketa enemi blong mi ya an bae olketa filsem fogud, an barava filnogud tumas, an kuiktaem nomoa bae olketa ranawe. (Singsing blong Deved. Hemi prea long Yawe long disfala singsing ya, from trabol wea Kus bin mekem long hem.)