Sams 59 - Pijin Bible

(Toktok go long God.)

¹ God blong mi, plis yu sevem laef blong mi from olketa enemi blong mi. Plis yu gadem mi, taem olketa kam fo faetem mi.

² Olketa nogud pipol ya, i save kilim man dae ya. Plis yu sevem mi from olketa.

^3-5 !Lod Yawe, yu lukim kam ya! Olketa ravis pipol ya i kam tugeta nao fo agensim mi. Ya, olketa we-weit nomoa fo kilim mi dae. Nomata mi no duim eni rong samting, an mi no duim eni nogud samting, olketa hariap an mekredi nomoa fo faet. Lod Yawe, yu garem evri paoa an yu God blong Israel. Plis yu getap, an kam fo helpem mi. Ya, wekap an panisim olketa hiden pipol ya. Yu mas no sore long olketa nogud pipol wea i spoelem nomoa olketa fren blong olketa.

⁶ Oltaem, olketa ya i kambaek long mi long ivining. An olketa i olsem olketa wael dog wea i gohed fo krae an go olobaot insaet long taon.

⁷ Olketa raf toktok i ka-kamaot from maos blong olketa, an olketa gohed nomoa fo tokspoelem mi. Toktok blong olketa hemi olsem olketa sap naef fo faet wea hemi save katem man. an olketa tingse no eniwan nao bae hemi save herem olketa.

⁸ Bat Lod Yawe, yu la-laf nomoa long olketa. Ya, yu mekfan nomoa long wei blong olketa hiden pipol ya.

⁹ God, oltaem mi trastem paoa blong yu. Yu nomoa yu sefples blong mi.

¹⁰ God blong mi hemi lavem mi tumas, an bae hemi kam an stap wetem mi. Ya, bae hemi letem mi lukim taem hemi winim olketa enemi blong mi.

¹¹ God, yu Masta blong mifala, an yu gohed fo gadem mifala mekem no eni trabol save kasem mifala. Plis yu no kilim olketa dae, nogud olketa pipol blong mi i fogetem hao yu bin panisim olketa pipol ya. Bat plis yu yusim paoa blong yu, fo mekem olketa evriwan i ranawe an lus finis.

^12-13 Evri toktok wea hemi kamaot long maos blong olketa hemi barava nogud tumas. So letem praod blong olketa ya hemi spoelem olketa seleva. An hemi gud sapos yu kros long olketa an spoelem olketa finis nao, bikos olketa mekem trabol fo kasem mifala, an olketa laea tumas. Sapos olsem, bae evriwan i save nao dat yu rul long Israel, an yu rulim evri ples long wol.

¹⁴ Oltaem, olketa ya i kambaek long mi long ivining. An olketa i olsem olketa wael dog wea i gohed fo krae an go olobaot insaet long taon.

¹⁵ Olketa ya i olsem olketa wael dog wea i go olobaot fo lukaotem kaikai, an sapos olketa no faendem naf kaikai, olketa save kros fogud.

¹⁶ Bat bae mi singsing fo talemaot paoa blong yu. An evri moning bae mi singsing bikfala abaotem bikfala lav blong yu. Oltaem, yu nao yu strongfala sefples blong mi. Ya, yu nao yu sefples blong mi long taem blong trabol.

¹⁷ God, bae mi gohed fo preisim yu olowe, bikos yu lavem mi tumas. Ya, yu nao yu sefples blong mi, an yu gad blong mi tu. (Singsing blong Deved. Hemi wakem fo tisim olketa pipol. Hemi wakem long taem wea hemi faet agensim olketa laen blong Aram wea i kamaot long Naharaem an Soba. Hem nao long semtaem wea Joab an ami blong hem olketa taneraon an gobaek long ples wea olketa kolem “vali fo tekem solt,” an long ples ya nao olketa kilim dae 12,000 man blong Idom.)