Sams 54 - Pijin Bible

(Toktok go long God.)

¹ God, plis yu sevem mi long paoa blong yu. Ya, long paoa blong yu, plis yu mekem mi fri.

² God, plis yu herem kam prea blong mi, an lisin long olketa toktok blong mi.

³ Olketa praod man i kam nao fo faetem mi, an olketa raf man i traehad nao fo kilim mi dae. Olketa ya i nating wari nomoa long yu, God.

(Toktok go long olketa pipol.)

⁴ Bat oltaem God nao hemi helpem mi. Hemi Masta blong mi, hu hemi gohed fo saetem mi.

⁵ Hemi gud fo God hemi panisim olketa enemi ya, long olketa ravis wei blong olketa seleva, Mi laek fo hemi spoelem olketa finis, bikos hemi kipim promis blong hem olowe.

(Toktok go long God.)

⁶ Lod Yawe, bae mi hapi tumas fo ofarem sakrifaes go long yu. Ya, bae mi tengkiu long yu bikos yu nao yu gud tumas.

⁷ Yu bin tekem mi aot finis from olketa trabol blong mi, an mi bin lukim dat olketa enemi blong mi i lus finis. (Singsing blong Deved. Hem nao fo singim wetem stringban.)