Sams 52 - Pijin Bible

(Toktok go long man.)

¹ !Sei Strongman! ?Waswe nao yu tokpraod abaotem olketa ravis samting wea yu bin duim agensim olketa hu God hemi lavem?

² Oltaem yu mekem olketa ravis plan fo spoelem olketa narafala pipol. Taem yu tok, tang blong yu hemi olsem wanfala sap resa. Ya, oltaem nomoa yu tingimaot evri laea toktok.

³ Yu laekem tumas olketa ravis wei winim olketa gudfala wei, an yu laekem tumas olketa laea toktok winim olketa tru toktok.

⁴ Yu man fo laea ya. Oltaem nomoa yu laekem tumas fo spoelem olketa pipol wetem olketa laea blong yu.

⁵ Dastawe bae God hemi spoelem yu olowe nao. Bae hemi kam an hemi tekem yu aot from hom blong yu. Ya, bae hemi finisim laef blong yu from disfala wol.

⁶ Bae olketa stretfala pipol i lukim an seke fogud, an bae olketa laf long yu. An bae olketa tok olsem,

⁷ “Yufala lukim man ya. Hemi no trastem nomoa God fo sevem hem. Hemi trastem olketa staka samting wea hemi garem, an hemi trastem tu olketa ravis wei blong hem fo gadem hem.”

⁸ Bat mi ya, mi olsem wanfala oliv tri wea hemi grou an hemi stap sef insaet long Tambuhaos blong God. Oltaem, God hemi lavem tumas olketa pipol, an bae mi trastem yu bikos yu tinghevi long mifala olowe.

(Toktok go long God.)

⁹ Oltaem bae mi talem tengkiu long yu God, fo olketa samting wea yu bin duim. An long ae blong olketa hu i tinghevi long yu, bae mi talemaot biknem blong yu, bikos yu nao yu gud tumas. (Singsing blong Deved.)