Sams 48 - Pijin Bible

(Toktok go long olketa pipol.)

¹ Yawe hemi God blong yumi, an hemi hae tumas. Long taon blong hem, long holi maonten blong hem, yumi mas barava liftimap nem blong hem.

² God, hemi King hu hemi garem paoa. Disfala maonten blong hem long Saeon hemi hae tumas, an hemi luk gudfala tumas. An taon ya blong God, hemi mekem evriwan long wol i hapi.

³ God hemi somaot finis dat taem yumi stap wetem hem long olketa strongfala sefples insaet long taon ya, yumi barava sef fogud.

⁴ Olketa king blong olketa narafala kantri i kam tugeta, nao olketa hipap kam raonem taon ya fo faetem yumi.

⁵ Bat taem olketa lukim taon ya long Saeon, olketa seke fogud, nao olketa fraet an ranawe.

⁶ Olketa barava fraet fogud, an olketa fil olsem woman wea hemi gohed fo bonem pikinini.

⁷ Olketa olsem tu olketa sip wea bikfala saekloun hemi bloum go olobaot.

⁸ Yawe hu hemi garem evri paoa, hemi God blong yumi. Yumi herem finis olketa samting wea hemi bin duim bifoa, an distaem yumi lukim moa long taon blong hem ya. Ya, bae hemi gadem taon ya olowe.

(Toktok go long God.)

⁹ God, insaet long Tambuhaos blong yu, mifala tingim wei wea oltaem yu lavem mifala tumas.

¹⁰ Evriwan long evri ples, i preisim yu, an evri pipol long wol i preisim biknem blong yu. Yu rulim olketa pipol long stretfala wei.

¹¹ So hemi gud fo mifala evriwan long Saeon i hapi. Yu jajem evri pipol long stretfala wei. Dastawe, hemi gud fo mifala evriwan long olketa taon long Jiuda i hapi.

(Toktok go long olketa pipol.)

¹² Olketa pipol blong God, yufala wakabaot goraonem bikfala taon ya long Saeon, an luksave long olketa gadhaos blong hem.

¹³ Ya, yufala lukluk gudfala long bikfala wolston blong hem, an yufala lukluk gudfala long olketa strongfala haos blong hem. An from diswan nao yufala save tok olsem long olketa wea bae i bon kam long laen blong yufala,

¹⁴ “God ya, hemi God blong yumi. An bae hemi gadem yumi evritaem olowe nao.” (Singsing blong olketa long laen blong Kora.)