Sams 47 - Pijin Bible

(Toktok go long olketa pipol.)

¹ !Yufala evriwan long evri ples, yufala mas klapem han! !Yufala mas singsing bikfala fo preisim God long olketa hapi singsing!

² Yumi mas tinghae long Yawe hu hemi hae tumas. Hemi King hu hemi garem paoa, an hemi rul ovarem evri pipol long wol.

³ Hemi helpem yumi fo winim olketa pipol blong olketa narafala kantri. Ya, hemi mekem yumi fo rulim olketa.

⁴ Yumi nao laen blong Jekob, God hemi lavem yumi. Lan wea yumi stap long hem, wea yumi gohed fo praod long hem ya, God seleva nao hemi bin siusim fo yumi onam.

⁵ Yawe hu hemi God blong yumi, hemi go antap finis fo sidaon long tron blong hem. An taem hemi go antap olketa pipol i hapi an singaot bikfala, an olketa gohed fo bloum olketa trampet.

⁶ !Yumi singsing fo preisim God! Ya, yumi singsing fo preisim King blong yumi

⁷ !God nao hemi King ovarem evri ples long wol! !Yumi mas preisim hem long olketa singsing!

⁸ God hemi sidaon long holi tron blong hem, an hemi gohed fo rulim olketa kantri.

⁹ Olketa lida blong olketa narafala kantri i joen tugeta wetem yumi olketa pipol blong God blong Ebraham. Hemi garem moa paoa winim olketa ami, an bae hemi King ovarem evriwan. (Singsing blong olketa long laen blong Kora.)