Sams 41 - Pijin Bible

(Toktok go long olketa pipol.)

¹ Olketa pipol wea i gohed fo tingim olketa pua pipol, olketa ya nao i hapi, bikos Yawe bae hemi helpem olketa taem trabol hemi kasem olketa.

² Yawe bae hemi gadem olketa, an hemi lukaftarem laef blong olketa. An bae hemi mekem olketa hapi long lan blong olketa, an hemi no save lego long olketa long han blong olketa enemi.

³ An taem olketa sik, bae Yawe hemi helpem olketa. Ya, hemi mekem olketa fo gudbaek moa.

⁴ Taem mi sik, mi tok olsem, “Lod Yawe, mi bin duim olketa nogud samting long ae blong yu. Plis yu sore kam long mi, an mekem mi gudbaek moa.”

⁵ Olketa enemi blong mi i gohed fo tokspoelem mi. Olketa laekem nomoa fo mi dae, mekem no eniwan save tingim mi moa.

⁶ Olketa wea i kam fo lukim mi olketa toktok nating nomoa, olketa nating sore nomoa long mi. Olketa kam nomoa fo faendemaot olketa trabol blong mi, nao taem olketa gobaek, olketa gohed fo talemaot long evri ples.

⁷ Olketa wea i heitem mi, olketa gohed fo toksmol agensim mi, an olketa gohed fo tingim nomoa olketa nogud samting wea olketa laek fo kasem mi.

⁸ Olketa tok olsem, “Hemi barava sik fogud ya, an no longtaem bae hemi dae nao. Ya, bae hemi no save gudbaek moa.”

⁹ Nomata nambawan fren blong mi wea mi trastem tumas, hu oltaem save kaikai wetem mi, hemi agensim mi nao.

(Toktok go long God.)

¹⁰ Lod Yawe, plis yu sore kam long mi. Plis yu mekem mi gudbaek moa, mekem mi sensimbaek olketa nogud samting wea olketa enemi i bin du-duim long mi.

¹¹ Taem mi lukim dat olketa no save winim mi, bae mi jes save dat yu hapi long mi.

¹² Mi save dat bae yu helpem mi, bikos mi duim olketa stretfala samting. An bae mi stap wetem yu olowe.

(Toktok fo makem en long Buk wan.)

¹³ Yumi mas preisim Yawe hu hemi God blong yumi pipol blong Israel. Ya, yumi mas preisim hem distaem an evritaem olowe. !Ya! !Hem nao!