Sams 39 - Pijin Bible

(Toktok go long God.)

¹ Mi bin tok olsem, “Mi mas lukaot gudfala fo no talem eni toktok wea hemi no stret. An mi mas no letem maos blong mi fo mekem mi sin. Taem olketa nogud pipol i stap kolsap long mi, bae mi no tokabaotem trabol blong mi.”

² So mi stap kuaet nomoa, an mi no talem eni toktok. Ya, mi nating talem enisamting nao. Nomata olsem, trabol blong mi hemi kamap nogud go moa, hem nao mi wari tumas.

³ Ya, mi barava wari fogud, an taem mi tingim trabol blong mi ya, wari blong mi hemi jes kamap nogud go moa. Mi no save stap kuaet nao, so mi tok olsem,

⁴ “?Lod Yawe, fo hao long nao bae mi gohed fo stap olsem nomoa? ?Wataem nao bae mi dae? Plis yu talem mi wataem nao fo mi dae.

⁵ Distaem yu bin mekem laef blong mi fo hemi sotfala fogud. Long ae blong yu, taem blong mi fo laef hemi samting nating nomoa. Laef blong man, hemi olsem nomoa wanfala smolfala win, wea hemi blou fo lelebet taem nomoa, an finis nao.

⁶ Ya, hemi olsem sado nomoa. Evrisamting wea man hemi duim, hemi samting nating nomoa. Hemi gohed fo hipimap olketa gudfala samting, bat hemi no save nomoa hu nao bae hemi tekova long hem.”

⁷ ?So Masta, wanem nomoa mi weitem an trastem? !Yu nomoa mi save we-weitem an trastem!

⁸ Plis yu sevem mi from paoa blong olketa sin blong mi, an no letem olketa krangge pipol fo mekfan long mi.

⁹ Mi stap kuaet nao, an mi no talem enisamting tu, bikos yu nomoa yu mekem mi safa olsem.

¹⁰ Plis, yu no panisim mi moa. Mi kolsap dae nao, from olketa strongfala wip blong yu.

¹¹ Taem yu tokstrong long man fo panisim hem fo olketa sin blong hem, yu spoelem tu olketa samting wea hemi laekem tumas, olsem wea kokoros hemi save spoelem evrisamting. Ya hemi tru, man hemi olsem nomoa wanfala smolfala win, wea hemi blou fo lelebet taem nomoa, an finis nao.

¹² Lod Yawe, plis yu herem kam prea blong mi, an lisin kam long krae blong mi. Plis yu kam an helpem mi, taem mi krae olsem. Mi stap long wol ya olsem wanfala strensa wea hemi stap fo lelebet taem nomoa olsem olketa grani blong mi bifoa.

¹³ Plis yu no panisim mi moa, letem mi hapi fastaem. Bihaen, mi jes dae nao. (Singsing blong Deved)