Sams 38 - Pijin Bible

(Toktok go long God.)

¹ Lod Yawe, taem yu kros, plis yu no tokstrong long mi. Ya, taem yu kros tumas, plis yu no panisim mi.

² Yu mekem mi garekil finis long olketa aro blong yu. Ya, yu hitim mi an mi foldaon finis.

³ Bodi blong mi hemi barava filnogud tumas nao, bikos yu kros long mi. Ya, bodi blong mi hemi kamap nogud tumas from olketa sin blong mi.

⁴ Distaem olketa sin blong mi hemi kavaremap mi nao olsem wea mi draon insaet long solwata. Olketa sin blong mi hemi hevi tumas, an mi no save karim nao.

⁵ Bikos mi krangge tumas fo duim olketa nogud samting, olketa soa blong mi i kamap roten nao, an olketa barava smel fogud tu.

⁶ Olketa sin blong mi i daonem mi finis long graon nao. So mi gohed fo krae nomoa evri de, stat long moning go-go kasem tudak.

⁷ Mi sik an bodi blong mi hemi barava hot tumas, an kolsap fo mi dae nao.

⁸ Mi barava wik fogud an dae blong mi hemi kam kolsap nao. Ya, mi filim bodi blong mi hemi barava soa tumas, hem nao mi krae.

⁹ Lod Yawe, yu save finis evrisamting wea mi laekem. An yu herem finis tu wea mi krae fogud.

¹⁰ Distaem haat blong mi hemi pam-pam fogud, an mi wik fogud nao, an yu save lukim dat ae blong mi hemi no lukgud nao.

¹¹ Olketa fren blong mi, an olketa wantok blong mi i no save kam kolsap long mi nao, bikos mi garem olketa ravis soa ya. Olketa famili blong mi tu i no save kam an sidaon wetem mi nao.

¹² Olketa wea i laek fo kilim mi dae i mekem finis olketa trap fo mi, an olketa wea i laek fo spoelem mi, i promis finis fo duim. Oltaem nomoa olketa mekem olketa ravis plan agensim mi.

¹³ Mi olsem man wea hemi iapas, an hemi no save herem enisamting. Ya, mi olsem man wea tang blong hem hemi fas, an hemi no save toktok.

¹⁴ Ya, mi olsem man wea hemi no save ansa bikos hemi no save herem enisamting.

¹⁵ Bat Yawe, mi trastem yu, bikos yu nao yu Masta an God blong mi, an bae yu herem kam krae blong mi.

¹⁶ Plis yu no letem olketa enemi blong mi i hapi taem mi safa. An no letem olketa fo tokpraod taem olketa daonem mi.

¹⁷ Distaem mi safa olowe nomoa an kolsap fo mi dae nao.

¹⁸ Mi talemaot nao olketa nogud samting ya, bikos mi fraetem tumas olketa sin blong mi.

¹⁹ Olketa enemi blong mi, i strong olowe nomoa, an olketa no save sik. An staka long olketa heitem mi, fo nating nomoa.

²⁰ Fo olketa gudfala samting wea mi bin duim, olketa sensimbaek nomoa long olketa nogud samting. Olketa kaen pipol ya nao i agensim mi bikos mi duim olketa stretfala samting.

²¹ Lod Yawe, plis yu no lusim mi. God blong mi, plis yu no stap farawe from mi.

²² Masta yu nao save sevem mi, so plis kam kuiktaem fo helpem mi. (Singsing blong Deved. Hemi wakem fo Jedutun hu hemi lida blong kuaea.)