Sams 34 - Pijin Bible

(Toktok go long olketa pipol.)

¹ Bae mi gohed fo mekhae long Yawe, an bae mi gohed fo preisim hem olowe.

² Bae mi gohed fo preisim Yawe fo olketa samting wea hemi bin duim. Hemi gud fo olketa wea i safa fo herem olketa toktok ya, an bae olketa hapi.

³ Yufala kam an joen tugeta wetem mi, mekem yumi tokhae long nem blong Yawe. Ya, yumi mas liftimap nem blong hem.

⁴ Mi prea long Yawe, an hemi ansarem mi, nao hemi sevem mi from olketa samting wea mi fraetem.

⁵ Olketa wea i luk go long hem fo help, olketa nao i hapi. An bae olketa no save sem.

⁶ Taem laef blong mi hemi nogud, mi kol go long Yawe, nao hemi herem mi. Ya, hemi sevem mi nao from olketa trabol blong mi.

⁷ Oltaem Enjel blong Yawe hemi gohed fo gadem olketa wea i tinghae long Yawe, an hemi gohed fo sevem olketa from trabol.

⁸ Yawe hemi barava kaen tumas. Yufala trae fo trastem hem, an bae yufala save dat diswan ya hemi tru. Ya, olketa wea i go long hem fo hemi gadem olketa, olketa nao i hapi.

⁹ Yufala evri pipol blong Yawe, yufala mas tinghae long hem. Olketa wea i gohed fo tinghae long hem, olketa garem evrisamting wea olketa nidim.

¹⁰ Maet olketa strongfala laeon i save sot long kaikai, bat olketa wea i go long Yawe fo help, olketa nao i garem evri gudfala samting.

¹¹ Yufala olketa yanga, yufala kam an lisin long mi. Bae mi tisim yufala fo tinghae long Yawe.

¹² Sapos eniwan hemi laekem gudfala laef an hemi wande stap hapi evri de,

¹³ hemi mas no tok nogud, an hemi mas no laea.

¹⁴ Hemi mas lusim olketa ravis wei, an hemi mas falom olketa gudfala wei, an hemi mas traehad fo garem piis wetem olketa nara pipol.

¹⁵ Yawe hemi save luk go long olketa stretfala pipol, an hemi save lisin long prea blong olketa.

¹⁶ Bat Yawe hemi agensim olketa hu i duim olketa ravis samting. So taem olketa ya i dae, no longtaem bihaen, bae evriwan fogetem olketa nao.

¹⁷ Taem olketa stretfala pipol i krae go long Yawe, hemi herem olketa. Ya, hemi sevem olketa from evri trabol blong olketa.

¹⁸ Yawe hemi stap kolsap long olketa pipol wea i sore tumas. Ya, hemi gohed fo sevem olketa pipol wea tingting blong olketa hemi godaon finis.

¹⁹ Man wea hemi stret maet hemi safa long plande trabol, bat Yawe hemi sevem hem from olketa trabol ya.

²⁰ Yawe hemi gadem bodi blong hem, an no eni bon blong hem bae hemi brek.

²¹ Ravis wei blong olketa nogud pipol bae hemi mekem olketa fo dae. An olketa wea i heitem olketa stretfala pipol bae Yawe hemi panisim olketa.

²² Bat Yawe hemi sevem olketa wakaman blong hem. An olketa wea i go long hem fo stap sef, bae hemi no panisim olketa. (Singsing blong Deved.)