Sams 30 - Pijin Bible

(Toktok go long God.)

¹ Lod Yawe mi preisim yu bikos yu bin sevem mi, an yu no letem olketa enemi blong mi, fo mekfan long mi.

² Lod Yawe, yu nao yu God blong mi, mi krae long yu fo yu helpem mi, an yu mekem mi fo gudbaek moa.

³ Yu bin sevem laef blong mi, an yu bin stopem mi from dae

(Toktok go long olketa pipol.)

⁴ !Preisim Yawe, yufala hu i tinghevi long hem! Yufala mas preisim holi nem blong hem.

⁵ Hemi save kros nomoa fo lelebet taem, bat gudfala wei blong hem hemi save gohed fo ful laef blong man. Maet man hemi gohed fo krae long naet, bat long moning, bae hemi hapi fogud.

(Toktok go long God.)

⁶ Lod Yawe, mi save dat mi barava sef, so mi tok olsem long mi seleva, “Mi no fraetem enisamting nao.”

⁷ Bat yu bin gud tumas long mi, an yu bin gadem mi olsem wanfala strongfala wolston wea hemi stap raonem mi. Bat taem yu haedem fes blong yu from mi, mi barava fraet fogud.

⁸ Lod Yawe, taem mi kolem yu, mi bin askem yu fo helpem mi.

⁹ Mi bin tok olsem, “? Bae wanem nomoa yu winim, sapos mi dae? ?Watkaen gudfala samting nao bae yu garem, sapos mi godaon finis insaet long grev? !Olketa man hu i dae finis i no save preisim yu! An olketa no save talemaot gudfala wei blong yu.

¹⁰ Lod Yawe, plis yu herem mi, an sore kam long mi. Plis yu helpem mi.”

¹¹ Yu bin sensim finis sore blong mi, an yu mekem mi hapi moa an mi gohed fo dans. An yu tekemaot finis olketa ravis kaleko from mi wea hemi bin somaot sore blong mi, an yu mekem mi fo barava hapi moa.

¹² Dastawe bae mi no save stap kuaet nao. Bae mi preisim yu long olketa singsing. Ya, Lod Yawe, yu nao yu God blong mi, an bae mi gohed fo preisim yu olowe. (Singsing blong Deved.)