Sams 3 - Pijin Bible

(Toktok go long God.)

¹ Lod Yawe, olketa enemi blong mi ya i plande tumas. An olketa gohed fo agensim mi.

² Olketa tok olsem abaotem mi, “Bae God hemi no save helpem hem.”

³ Lod Yawe, yu nao yu olsem wanfala sil wea yu gohed fo gadem mi from trabol. Yu gohed fo mekem mi win, an yu gohed fo mekem tingting blong mi hemi kamap strong moa.

⁴ Mi krae kam long yu mekem yu helpem mi. An yu stap kam long holi maonten blong yu, an yu gohed fo ansarem mi.

⁵ Lod Yawe, taem mi leidaon long naet mi barava slip gudfala, an long moning mi wekap moa, bikos yu bin gohed fo lukaftarem mi gudfala.

⁶ Ovam 10,000 enemi i hipap raonem mi finis, an olketa gohed fo agensim mi, bat mi nating fraetem olketa nomoa.

⁷ !Lod Yawe, plis yu kam an sevem mi! !Yu nao yu God blong mi! Yu gohed fo panisim olketa enemi blong mi, an yu gohed fo brekemdaon paoa blong olketa.

⁸ Paoa fo sevem olketa pipol hemi stap long yu nomoa. Mi laekem yu fo blesim olketa pipol blong yu. (Singsing blong Deved. Hem nao hemi fo singim wetem gita.)