Sams 24 - Pijin Bible

(Toktok go long olketa pipol.)

¹ Yawe seleva nao hemi onam disfala wol wetem evrisamting insaet long hem. Graon ya wetem evrisamting wea i stap long hem, i blong hem ya.

² Hemi putum disfala graon ya long midol long solwata, an hemi putum faondesin blong hem, barava long botom blong dipsi.

³ ?Hu nao hemi garem raet fo go antap long hil blong Yawe? ?An hu nao hemi fitim fo go insaet long holi ples blong hem ya?

⁴ Olketa wea i save lukim Yawe nao, olketa pipol ya wea tingting blong olketa hemi klin an laef blong olketa hemi stret, an olketa wea i no save wosipim olketa laea god, an i no save mekem olketa laea promis.

⁵ An olketa nao i stret long ae blong God, an bae hemi blesim olketa an hemi sevem olketa.

⁶ Olketa stretfala pipol olsem nao i save lukim Yawe, an save kam long God ya blong Jekob.

⁷ !Yufala mas openem bikfala olketa doa ya! !Olketa olfala doa ya, yufala mas open tu! Nao King ya hu hemi barava hae fogud bae hemi kam insaet.

⁸ ?Hu nao disfala king wea hemi hae fogud ya? !Hem nao Yawe ya, hu hemi strong, an hemi garem paoa! !Hem nao Yawe ya, hu hemi winim faet olowe!

⁹ !Yufala mas openem bikfala long olketa doa ya! !Olketa olfala doa, yufala mas open tu! Nao King ya hu hemi barava hae fogud bae hemi kam insaet.

¹⁰ ?Hu nao disfala king wea hemi barava hae fogud ya? !Hem nao Yawe ya hu hemi garem olketa paoa! !An hem nao King hu hemi barava hae fogud ya! (Singsing blong Deved.)