Sams 19 - Pijin Bible

(Toktok go long olketa pipol.)

¹ Skae hemi gohed fo somaot olowe bikfala paoa blong God, an evrisamting wea i stap long skae ya hemi gohed fo som yumi olketa gudfala waka wea God hemi duim.

² Evri de olketa pipol i save lukim bikfala paoa ya blong God an evri naet olketa pipol i save lukim olketa gudfala waka blong hem.

³ Skae wetem evrisamting ya i no save tokaot, an yumi no save herem voes blong olketa,

⁴ nomata olsem, toktok blong olketa hemi goaot finis long evri pipol long wol ya, an toktok blong olketa hemi go-go kasem evri ples long wol nao. God hemi mekem ples blong san antap long skae.

⁵ An san ya hemi gohed fo kamap long moning, hemi kamaot olsem wanfala man wea hemi redi fo marit, an hemi olsem wanfala man fo resis wea hemi hapi tumas fo ran.

⁶ Hemi stat long wanfala saet blong skae, an hemi go akros long narafala saet. An no enisamting i save haed from hot blong hem.

Lo blong God (Toktok go long olketa pipol.)

⁷ Lo blong Yawe hemi barava stret fogud, an hemi mekem yumi fo filstrong moa. Hemi fitim fo yumi trastem olketa rul blong Yawe, an hemi gohed fo givim waes long olketa wea i no waes.

⁸ Olketa tising blong Yawe hemi stret, an olketa wea i gohed fo obeim i hapi. Olketa strongfala toktok blong hem hemi stret, an hemi gohed fo givim gudfala save long yumi.

⁹ Wei ya wea yumi tinghae long Yawe, hemi barava gud tumas, an bae hemi no save finis. Wei wea Yawe hemi jaj, hemi tru fogud, an oltaem hemi stret tumas.

¹⁰ Mi laekem tumas olketa toktok blong Yawe bikos hemi moabeta long staka seleni, an hemi suit moa winim hani.

(Toktok go long God.)

¹¹ Lod Yawe, olketa toktok blong yu ya i gohed fo mekem mi save, wea mi nao wakaman blong yu. An yu givim gudfala samting long mi, bikos mi gohed fo obeim olketa toktok ya.

¹² Lod Yawe, no eniwan save lukim olketa sin blong hem seleva. Plis yu mekem mi fri from olketa sin wea mi duim bat mi no luksave.

¹³ Plis yu lukaftarem mi from olketa sin wea mi laek fo duim, an no letem olketa wei ya blong sin hemi bosim mi. Sapos olsem nao, bae mi kamap barava stret, an kamap fri from paoa blong sin.

¹⁴ Lod Yawe, yu nao yu strongfala ples blong mi fo haed, an yu nao yu mekem mi fri. Mi laekem olketa toktok blong mi an olketa tingting blong mi, hemi stret gudfala long ae blong yu. (Singsing blong Deved.)