Sams 17 - Pijin Bible

(Toktok go long God.)

¹ Lod Yawe, plis yu herem kam krae blong mi, wea mi krae kam long yu fo yu stretem olketa trabol blong mi. Plis yu herem kam prea blong mi, bikos mi no save laea.

² Taem yu jaj, bae yu saet wetem mi, bikos yu nao yu save wanem hemi stret.

³ Yu save long tingting blong mi. Yu bin kam finis long mi long naet, an yu luksave finis long laef blong mi, wea mi no laekem eni ravis samting.

⁴ Mi no save toktok nogud olsem olketa narafala pipol i duim. Mi bin obeim olketa toktok blong yu, an mi nating falom olketa wei fo faet.

⁵ Oltaem mi gohed fo falom yu, an mi nating save lusim yu.

⁶ God, mi prea long yu bikos yu save herem mi. Plis yu herem kam olketa toktok blong mi.

⁷ Plis yu somaot lav blong yu wea hemi gudfala tumas. Taem mi stap wetem yu, mi barava sef from olketa enemi blong mi.

⁸ Mi askem yu fo lukaftarem mi barava gudfala, olsem wea yu gohed fo lukaftarem ae blong yu seleva. An yu haedem mi olsem wea kokorako hemi haedem olketa pikinini blong hem andanit long wing blong hem.

⁹ Sapos yu duim olsem, bae olketa nogud pipol i no save kam fo faetem mi. Olketa enemi blong mi i hipap finis raonem mi fo kilim mi dae, bat bae olketa no save winim mi.

¹⁰ Olketa gohed fo tok praod an olketa nating sore nao long eniwan hu hemi garem trabol.

¹¹ Nomata mi tane go long eni saet, olketa raonem mi finis nao, an olketa gohed olowe nomoa fo lukluk fo eni sans fo daonem mi.

¹² Olketa we-weit nomoa fo pisisim bodi blong mi, olsem wanfala laeon taem hemi hanggre an hemi weitem eni smolfala animol fo kaikaim.

^13-14 Lod Yawe, plis yu kam an faetem olketa enemi blong mi, an yu winim olketa ya. Plis yu sevem mi long bikfala paoa blong yu from olketa nogud pipol hu i tingim nomoa hao fo hapi long disfala laef. Plis yu sevem mi, an yu tekem mi aot from han blong olketa, an yu panisim olketa. Plis yu panisim olketa long olketa safaring ya wea yu bin redim finis fo givim long olketa. Yu mekem panis ya fo hemi gohed go-go hemi kasem olketa pikinini blong olketa, an olketa grani blong olketa tu.

¹⁵ Bat bae mi save lukim yu taem mi wekap, bikos mi no duim eni nogud samting, an bae mi hapi tumas, bikos mi stap nomoa wetem yu. (Singsing blong Deved, wakaman blong Yawe. Hemi preisim hem long singsing ya, long taem wea Yawe hemi sevem hem taem hemi tekem hem aot long han blong Sol an long paoa blong olketa enemi blong hem.)