Sams 150 - Pijin Bible

Yumi preisim Yawe (Toktok go long olketa pipol.)

¹ !Yumi preisim Yawe! Yumi preisim God long Tambuhaos blong hem. Ya, yumi preisim hem fo paoa blong hem long heven.

² Yumi preisim hem fo olketa bikfala samting wea hemi bin duim. Ya, yumi preisim hem bikos hemi barava hae fogud.

³ Yumi preisim hem long olketa trampet. Ya, yumi preisim hem long olketa deferen kaen gita.

⁴ Yumi dans, an preisim hem long olketa dram. Ya, yumi preisim hem long olketa ukalele an olketa bambu paep.

⁵ Yumi preisim hem long olketa simbol wea hemi save mekem bikfala noes.

⁶ Hemi gud tumas fo evrisamting wea hemi laef, fo preisim Yawe. !Ya, yumi preisim Yawe!