Sams 14 - Pijin Bible

(Toktok go long olketa pipol.)

¹ Olketa krangge pipol i tingse, “No eni God nomoa hemi stap.” Evri nogud pipol nomoa i stap, an olketa gohed fo duim evri ravis samting. No eniwan long olketa nao hemi stret.

² Yawe hemi stap long heven, an hemi gohed fo luk kamdaon long evri pipol, fo lukim kam sapos eniwan wea hemi waes, an eniwan wea hemi trastem hem.

³ Bat olketa evriwan i go rong finis nao, an olketa evriwan nomoa i nogud. No eniwan long olketa, hemi duim eni gudfala samting.

⁴ Yawe hemi gohed fo tok olsem, “?Waswe, olketa ya i no save? ?Waswe, evri nogud pipol ya, i nating save nomoa ya? Olketa ya i spoelem olowe olketa pipol blong mi, an olketa nating prea long mi tu.”

⁵ Bat bae olketa ya i fraet fogud, bikos God hemi saet wetem olketa pipol wea i obeim hem.

⁶ Olketa nogud pipol ya i laek fo spoelem tingting blong olketa pua pipol, bat Yawe hemi gohed fo gadem olketa.

⁷ God blong yumi olketa Israel pipol, hemi stap long Saeon. Mi laekem tumas fo hemi kam an sevem yumi. An taem wea Yawe hemi mekem yumi fo garem gudfala laef moa, bae yumi barava hapi fogud. (Singsing blong Deved.)