Sams 139 - Pijin Bible

(Toktok go long God.)

¹ Lod Yawe, yu lukim finis insaet long laef blong mi, an yu barava savegud long mi nao.

² Yu save finis long evrisamting wea mi duim. Nomata yu stap farawe, bat yu save nomoa long evri tingting blong mi.

³ Yu lukim nomoa taem mi waka an taem mi res, an yu save long evrisamting wea mi duim.

⁴ Ya, nomata mi no toktok yet, yu save finis long olketa samting wea bae mi talem.

⁵ Yu gadem mi long evri saet, an yu lukaftarem mi long paoa blong yu.

⁶ Yu barava save gudfala tumas long mi, an mi no save nao hao bae mi save long diswan.

⁷ ?Sapos mi wande haed from yu, wea nao bae mi save haed long hem? ?Sapos mi wande ranawe from yu, wea nao bae mi save go long hem?

⁸ Nomata mi goap long heven, bat yu long dea finis. An nomata taem mi dae an godaon insaet long grev, bat yu long dea finis tu.

⁹ Nomata mi ranawe go long ist, o mi go farawe long west,

¹⁰ bat yu stap dea finis fo lidim mi an helpem mi.

¹¹ Sapos mi askem tudak fo haedem mi, o mi askem delaet fo kamap naet,

¹² bae hemi nating deferen nomoa long yu. Bikos tudak ya hemi nating dak nomoa long yu, an naet hemi saen nomoa olsem delaet long yu. Ya, tudak an delaet hemi semsem nomoa long yu.

¹³ Taem mi stap yet insaet long bele blong mami blong mi, yu nao yu mekem evri pat long bodi blong mi, an yu joenem olketa tugeta.

¹⁴ Mi preisim yu bikos wei wea yu bin mekem mi hemi barava nambawan an hemi spesol. Long evri tingting blong mi, mi barava save nao dat evrisamting yu bin mekem hemi barava gud tumas.

¹⁵ Taem mi stap yet insaet long bele blong mami blong mi, yu lukim mi finis. Ya, yu lukim mi finis taem olketa bon blong mi i stat kam. An taem mi grou haed kam long bele blong mami blong mi, yu save finis wea mi stap long dea.

¹⁶ Taem mi no bon kam yet, yu lukim mi. Bifoa olketa de long laef blong mi hemi stat, yu bin mekem olketa finis, an yu raetemdaon long buk blong yu.

¹⁷ God, yu garem plande deferen tingting, an mi kanot save long olketa nao.

¹⁸ Mi no save kaontem olketa finis, bikos olketa i plande tumas winim sanbis. Taem mi kasem en long laef blong mi, bae mi stap yet wetem yu.

¹⁹ God, mi laekem tumas fo yu kilim dae olketa nogud pipol ya. !An mi laekem tumas olketa man fo faet mas goawe from mi!

²⁰ Olketa toknogud abaotem yu, an olketa tokspoelem nem blong yu.

²¹ Lod Yawe, mi barava heitem olketa hu i heitem yu. Ya, mi barava les long olketa bikos olketa gohed fo agensim yu.

²² Mi luk long olketa ya olsem olketa enemi blong mi. Dastawe nao mi barava heitem olketa nao.

²³ God, plis yu luksave kam long maen blong mi, an yu savegud long tingting blong mi.

²⁴ Plis, yu lukluk kam long laef blong mi, nogud eni ravis wei hemi stap yet long hem. Plis, yu lidim mi long gudfala wei blong yu wea hemi no save finis. (Singsing blong Deved.)