Sams 138 - Pijin Bible

(Toktok go long God.)

¹ Lod Yawe, mi tengkiu long yu long evri tingting blong mi. Mi singsing fo preisim yu long ae blong olketa god blong olketa hiden pipol.

² Mi baodaon go long Tambuhaos blong yu an mi preisim nem blong yu, bikos yu lavem mi tumas an oltaem yu kipim olketa promis blong yu. Yu nao yu mekem mifala fo save dat nem blong yu an olketa toktok blong yu i hae moa winim evrisamting.

³ Taem mi kol kam long yu, yu herem mi, an yu mekem mi strong moa long paoa blong yu.

⁴ Lod Yawe, evri king long wol bae i preisim yu, bikos olketa herem finis promis blong yu.

⁵ Lod Yawe bae olketa singsing abaotem olketa samting wea yu bin duim, bikos yu nao yu garem bikfala paoa.

⁶ Nomata yu hae tumas, oltaem yu lukaftarem nomoa olketa pipol hu i hambol. Bat olketa praod pipol i no save haed from yu.

⁷ Taem olketa trabol i kasem mi, yu nao yu sevem mi. Yu agensim olketa enemi blong mi hu i kros tumas long mi, an yu sevem mi long paoa blong yu.

⁸ Lod Yawe, mi save dat bae yu duim evrisamting wea yu bin promisim long mi, bikos lav blong yu fo mifala hemi no save finis. Plis yu no lusim mifala olketa pipol blong yu wea yu bin mekem. (Singsing blong Deved.)