Sams 137 - Pijin Bible

Krae blong olketa Israel pipol taem olketa stap long Babilon (Toktok go long olketa pipol.)

^1-2 Taem mifala stap kam long Babilon, mifala bin si-sidaon long saet long olketa riva fo sore nomoa. So mifala hangem olketa gita blong mifala long olketa tri an gohed fo krae nomoa, bikos mifala tingimbaek tumas Saeon.

³ Olketa hu i mekem mifala fo slev, i talem mifala fo singsing. Olketa tok olsem long mifala, “Yufala singim wanfala singsing abaotem Saeon.” Olketa laekem mifala fo singsing fo mekem olketa hapi, bat olketa mekfan long mifala nomoa.

⁴ Bat mifala tok olsem, “?Hao nao bae mifala save singsing go long Yawe taem mifala stap long deferen kantri olsem?”

(Toktok ya hemi abaotem Jerusalem.)

⁵ Jerusalem, sapos mi no tingim yu, hemi gud tumas sapos mi no save moa hao fo ringim gita blong mi.

⁶ Ya, sapos mi no tingim yu moa Jerusalem, an sapos mi no tingim moa wea yu nao yu mekem mi barava hapi tumas, hemi gud tumas sapos mi no save moa hao fo singsing.

(Toktok go long God.)

⁷ Lod Yawe, plis yu tingim olketa nogud samting wea olketa pipol blong Idom i bin talem long mifala, long de ya wea olketa pipol blong Babilon i faetem mifala long Jerusalem. Olketa pipol blong Idom i bin gohed fo tok olsem, “!Brekemdaon taon ya! !Daonem go long graon!”

(Toktok go long pipol long Babilon.)

⁸ Yufala olketa pipol blong Babilon, bae God hemi spoelem yufala finis. Olketa hu bae i sensimbaek olketa nogud samting ya wea yufala bin duim long mifala, olketa nao i hapi.

⁹ Ya, olketa hu bae i tekem olketa bebi blong yufala an trom olketa long olketa bikfala ston, olketa nao i hapi. (Singsing blong Deved.)