Sams 136 - Pijin Bible

Singsing fo talem tengkiu long God (Toktok go long olketa pipol. An olketa pipol hu i ansa, olketa tok olsem, “Ya, bikos hemi tinghevi long yumi olowe.”)

¹ Yumi talem tengkiu long Yawe, bikos hemi gud tumas. Ya, bikos hemi tinghevi long yumi olowe.

² Yumi talem tengkiu long hem, bikos hemi hae moa winim evri narafala god. Ya, bikos hemi tinghevi long yumi olowe.

³ Yumi talem tengkiu long hem, bikos hemi garem paoa moa winim evri narafala god. Ya, bikos hemi tinghevi long yumi olowe.

⁴ Hem nomoa hemi save mekem olketa bikfala mirakol. Ya, bikos hemi tinghevi long yumi olowe.

⁵ Long waes blong hem hemi mekem evrisamting long skae. Ya, bikos hemi tinghevi long yumi olowe.

⁶ Hemi stanemap graon ya, long dipsi. Ya, bikos hemi tinghevi long yumi olowe.

⁷ Hemi mekem san an mun. Ya, bikos hemi tinghevi long yumi olowe.

⁸ Hemi mekem san fo saen long de. Ya, bikos hemi tinghevi long yumi olowe.

⁹ An hemi mekem mun wetem olketa sta fo saen long naet. Ya, bikos hemi tinghevi long yumi olowe.

¹⁰ Hemi kilim dae olketa fasbon san blong olketa long Ijip. Ya, bikos hemi tinghevi long yumi olowe.

¹¹ Hemi lidim olketa Israel pipol, fo kamaot from Ijip. Ya, bikos hemi tinghevi long yumi olowe.

¹² Hemi duim olketa samting ya long bikfala paoa blong hem. Ya, bikos hemi tinghevi long yumi olowe.

¹³ Hemi mekem Red Si hemi divaed, an drae graon hemi kamaot. Ya, bikos hemi tinghevi long yumi olowe.

¹⁴ Hemi lidim olketa Israel pipol fo go akros long drae graon nomoa. Ya, bikos hemi tinghevi long yumi olowe.

¹⁵ Bat hemi draonem king blong Ijip wetem olketa soldia blong hem long Red Si. Ya, bikos hemi tinghevi long yumi olowe.

¹⁶ Hemi lidim olketa Israel pipol insaet long drae eria, go-go olketa kasem Kenan. Ya, bikos hemi tinghevi long yumi olowe.

¹⁷ Hemi kilim dae olketa king wea i garem paoa. Ya, bikos hemi tinghevi long yumi olowe.

¹⁸ Hemi kilim dae olketa king wea i garem biknem. Ya, bikos hemi tinghevi long yumi olowe.

¹⁹ Hemi kilim dae King Sihon, wea i king blong olketa long laen blong Amoa. Ya, bikos hemi tinghevi long yumi olowe.

²⁰ An hemi kilim dae King Og, wea i king long Basan. Ya, bikos hemi tinghevi long yumi olowe.

²¹ Hemi givim olketa graon blong olketa ya fo olketa Israel pipol. Ya, bikos hemi tinghevi long yumi olowe.

²² Hemi givim olketa graon ya long olketa Israel pipol wea i wakaman blong hem. Ya, bikos hemi tinghevi long yumi olowe.

²³ Hemi no fogetem yumi taem olketa enemi blong yumi i winim yumi. Ya, bikos hemi tinghevi long yumi olowe.

²⁴ Hemi mekem yumi fri from olketa enemi blong yumi Ya, bikos hemi tinghevi long yumi olowe.

²⁵ Hemi gohed fo givim kaikai long evrisamting long wol. Ya, bikos hemi tinghevi long yumi olowe.

²⁶ Yumi talem tengkiu long God hu hemi stap long heven. Ya, bikos hemi tinghevi long yumi olowe.