Sams 135 - Pijin Bible

Singsing fo preisim God (Toktok go long olketa pipol.)

^1-2 !Yufala mas preisim Yawe! Yufala olketa wakaman blong hem, yufala mas preisim nem blong hem Yufala hu i stap insaet long Tambuhaos blong God blong yumi, yufala mas preisim hem.

³ Yufala mas preisim Yawe, bikos hemi gud tumas. An yufala mas singsing fo preisim nem blong hem, bikos hemi kaen tumas.

⁴ Yawe hemi siusim laen blong Jekob fo kamap pipol blong hem. Ya, hemi siusim finis olketa pipol blong Israel fo barava pipol blong hem.

⁵ Mi save dat Yawe hemi hae tumas. Ya, Masta blong yumi hemi hae moa winim olketa narafala god.

⁶ Hemi save duim nomoa enisamting wea hemi laekem, long skae an long graon, long solwata an insaet long dipsi.

⁷ Hemi mekem olketa klaod fo kamap long skae, an hemi mekem laetning fo kam wetem saekloun, an hemi mekem win fo blou kam long yumi long saet long not.

⁸ Hem nao hemi kilim dae olketa fasbon pikinini blong olketa Ijip pipol, an fasbon long evri animol blong olketa tu.

⁹ Hemi mekem olketa mirakol an olketa bikfala samting tu fo hapen long ples ya, fo panisim king blong olketa an evri bikman blong hem.

¹⁰ Hemi spoelem finis olketa pipol blong plande narafala kantri, an hemi kilim dae olketa king hu i strong tumas.

¹¹ Hemi kilim dae King Sihon hu hemi king long laen blong Amoa, an King Og hu hemi king blong Basan, an hemi kilim dae evri king long Kenan tu.

¹² Hemi givim graon blong olketa king ya long yumi olketa pipol blong hem long Israel.

(Toktok go long God.)

¹³ Lod Yawe, bae olketa pipol i save long biknem blong yu olowe nao. Ya, oltaem bae olketa pipol i talemaot dat yu nao God.

¹⁴ Bae yu talem dat olketa pipol blong yu i stret, an bae yu sore long olketa wakaman blong yu.

(Toktok go long olketa pipol.)

¹⁵ Olketa god blong olketa hiden pipol ya, olketa man nomoa i wakem long silva an gol

¹⁶ Olketa god ya i garem maos bat olketa no save toktok, an olketa garem ae bat olketa no save lukluk.

¹⁷ Olketa garem ia bat olketa no save herem enisamting. Ya, olketa nating garem laef.

¹⁸ Hemi gud tumas sapos olketa pipol hu i wakem olketa kaving ya, an olketa pipol hu i wosipim olketa ya, fo no garem laef olsem olketa kaving ya tu.

¹⁹ Yumi olketa Israel pipol mas preisim Yawe. Ya, yufala olketa prist blong hem, mas preisim hem tu.

²⁰ Yufala olketa pipol long traeb blong Livae mas preisim Yawe. Ya, yumi evriwan hu i tinghae long hem mas preisim hem.

²¹ Yumi mas preisim hem long Jerusalem, long ples wea hemi stap long Saeon. !Ya, yumi preisim Yawe!