Sams 132 - Pijin Bible

(Toktok go long God.)

¹ Lod Yawe, plis yu mas tingim hadlaef wea King Deved hemi bin gotru long hem.

² Lod Yawe, yu nao yu God blong Jekob, an yu garem evri paoa. Plis yu tingim promis wea Deved hemi bin mekem long yu.

^3-5 Hemi bin promis olsem, “Lod Yawe, yu nao yu God blong Jekob, an yu garem evri paoa. Mi mas faendem wanfala ples fo yu stap long hem. Sapos nomoa bae mi no save go insaet long haos blong mi, o res, o slip.”

⁶ Taem mifala stap long Betlehem, mifala bin herem stori abaotem Tambu Boks long Spesol Agrimen blong yu. Nao taem mifala kam long Kiriat-Jearim, mifala faendem Tambu Boks ya.

⁷ An mifala tok olsem, “Kam, yumi go long Tambuples blong Yawe. Yumi mas wosipim hem long ples wea hemi sidaon long hem fo rul.”

⁸ Lod Yawe, plis yu kam an stap olowe long ples blong yu wetem Tambu Boks ya wea hemi saen blong bikfala paoa blong yu.

⁹ Plis yu mekem olketa prist blong yu fo duim olketa stretfala samting olowe, an mekem olketa hu i tinghevi long yu i hapi an singaot bikfala.

¹⁰ Lod Yawe, bifoa kam, yu bin mekem wanfala promis long wakaman blong yu King Deved. So plis yu no les long king blong mifala ya wea yu bin siusim.

¹¹ Yu bin mekem wanfala strongfala promis long Deved wea yu no save brekem. Ya, yu bin promis olsem, “Bae mi mekem wanfala long olketa san blong yu fo kamap king, an bae hemi rul bihaen long yu.

¹² An sapos olketa hu bae i bon kam bihaen long yu i gohed fo falom agrimen blong mi, an falom olketa tising wea mi bin givim long olketa, bae olketa save kamap king, an save rul bihaen long yu olowe nao.”

(Toktok go long olketa pipol.)

¹³ Yawe nao bin siusim fo mekem hom blong hem long Saeon.

¹⁴ Hemi tok olsem, “Hem nao ples wea bae mi stap olowe long hem. Ples ya bae hemi hom blong mi nao, bikos mi laekem tumas.

¹⁵ Bae mi givim plande gudfala samting long olketa pipol long Saeon. An bae mi givim plande kaikai long olketa pua pipol long ples ya fo mekem olketa hapi.

¹⁶ Bae mi blesim evrisamting wea olketa prist long ples ya i duim. An olketa hu i tinghevi long mi long ples ya bae i singsing an singaot bikfala bikos olketa hapi tumas.

¹⁷ Bae mi mekem wanfala long olketa hu i bon kam bihaen long King Deved, fo kamap wanfala strongfala king. An bae mi lukaftarem hem gudfala mekem hemi save rul olowe.

¹⁸ Bae mi mekem evriwan long kantri blong hem fo garem gudfala laef, bat olketa enemi blong hem, bae mi mekem olketa fo sem olowe nao.” (Singsing blong Deved. Olketa singim disfala singsing taem olketa goap fo fist long Jerusalem.)